Hemvervatoxa Komîsyonê Zîndanan ê OHDyî Destina Yildiz derheqê binpaykerdişanê zîndanan de ANFyî rê qisey kerd.

Yildize vat: ''Zîndanan de binpaykerdişê heqanê cîya cîya qewimîyene. Rayîrê muracatanê nînan zî goreyê ci cîya yê. Vera cigêrayîşê rûtî, derb, îşkenceyî ganî verî dozgerîye rê muracat bêro kerdene. Vera cezayanê resnayîşî, qedexekerdişê zîyaretî, cezayanê dîsîplîn û sansurkerdişê mektûban û heme kerdişanê ke heqê xeberdayîşî binpay kenê ya zî hurmetê vera cuya taybete binpay kenê ganî dadgerîya înfazî rê muracat bêro kerdene û wedaritişê qerarî bêro waştene. Reyna vera  nêdayîşê rojname, kovare û kitaban zî seba ke azadîya îfadeyî yena binpaykerdene nê rewşan de zî ganî dadgerîya înfazî rê muracat bêro kerdene. Hetê bînî ra seba ke îdareyê zîndanî wezîfeyê xo xirab kerdo ganî gerreyê ey zî bêro kerdene.

Komîsyonê Heqanê Merdiman ê Meclîsî zî esto eke hewce bikero çew eşkeno muracatê nê zî bikero. Reyna dezgehê heqanê merdiman û baroyî est ê. Eke heqê weşîye bêro binpaykerdene ganî Yewîya Tabîbanê Tirkî de gereyê doktoran bêro kerdene. Pîya bi tepişteyan merdimê înan zî eşkenê muracat bikerê. Ganî heme rayîranê huqûqî rê muracat bêro kerdene û proses bêro teqîpkerdene. Tepişteyî raştê şîdetê pîlî yê psikolojîk  ge ge zî raştê hêrişê fîzîkî yenê. Hêrişo ke tepitşeyanê sîyasîyan rê bîyênî nika vera tepişteyanê edlîyan zî yeno kerdene.Tepişteyî rîyê zext û îşkenceyî ra cehd kenê xo bikişê. Zîdanan de şîdet zedîya yo. Cehdkerdişê xokiştişî tesadur nîyo.

Seba ke hêrişkarî nînê cezakerdene verê şîdetî zafêr abeno. Tepişteyê ke nêweşxaneyan de mirenê wesayîtê cenaza nêdanê ci, cenazayî yenê remnayene, definkerdiş binê ablûqaya polîs û leşkeran de yeno kerdene, xema tezîye nêdîyena keyeyanê tepişteyan. Pêro nê caardişî heqê hurmetî yê keyeyî cuya taybete û azadîya dîn û bawerîye binpay kenê û  caardişê cezaya huqûqê dişmenî yê.''