Wekîlê HDPyî yê Kocaelî Omer Faruk Gergerlîogluyî derheqê îşkence û merganê zîndanan de ANFyî rê qisey kerd.

Gergerlîogluyî ard ziwan ke hûmara zîndanan roje bi roje zêdîyena û vat: ''Seba ke teber de teda zêdîyena zîndanan de zî zêdîyena. Seba ke Tirkîya de edalet çin o, merdimî bi rehetî tepişîyenê.  Tirkîya de nila 314 hezar tepişteyî û 383 zîndanî est ê. Emser 37 zîndanê neweyî do bêrê viraştene. Xora Rûsya ra pey tewr zaf Tirkîya de zîndanî est ê. A raşte rewşa demokratîke de hende zîndanî xora hewce nêkenê. Na hûmare bi xo her çî eşkera kena. Zîndanan de binpaykerdişê heqan est ê, heqê weşîye nêno caardene. 

Têna 4 mengan de zîndanan de 24 kesî merdê. Hetê bînî ra hema zî zîndanan de nêweşê giranî û nêweşê kanserî est ê ke rêzê mergî de yê. Menganê peyênan de çend tepişteyê ciwanî merdî. Vanê înan xo kişto la gereka sebebê ney zî bêro eşkerakerdene. Sîlîvrî de îfadeyanê gardîyanan mojna ke seba xokiştişî teşwîq est o. Reyna mîsal merganê Garîbe Gezer, Mehmet Sevînçî de wesayîtê cenazayan nêdîya. Malayan nêwaşt cenazayan bişuwê. No sûc o.  Ma eşkenê vajê ke vera cenazayanê tepişteyanê sîyasîyan ê kurdan ablûqa est a.

Warê tepişteyanê sîyasîyan de Tirkîya rêzê yewinî de ya. 70-80 hezar tepişteyê sîyasîyî est ê. Nika tay zîndanan de grevê vêşanîye est ê. Nê pêro kerdişî rewşa polîtîk û komelkîye eşkera kenê. Nê kerdişî îqtîdarê nikayêne ra azade nênê ercnayene.''