Vervatoxê verênî yê Înîsîyatîfê Paştdayîşê bi Tepişteyan (TDÎ) Hidir Saburî derheqê tedaya vera tepişteyan û keyeyanê tepişteyan de ANFyî rê qisey kerd.

Saburî bale ante ser ke prosesê Korona de bi bahaneya janî xeylêk heqê tepişteyan ameyî xespkerdene û vat: ''Têna zîndanan de nê teber de zî teda est a. Seba ke ma vera merganê zîndanan eşkerayîye daye 12 embazê ma ameyî destbendkerdene. Prosesê janî de sey qanûnê 5275. qanûnê neweyî ameyî vetene, heyetê înfazî ronîyayî. Eke heyet nêwazo tepişteyê ke cezaya înan qedîyaya, vera nêdîyenê. Seba tepişteyan pêro çalakîyî qîmetîn ê. Bi taybeyî ganî keyeyê tepişteyan tewrê çalakîyan bibê. La keyeyî teda ra tersenê. Seba ke tersê tepişteyan bişiknê ma tim paştî danê înan.

Zîndanê Sîlîvrî de û zîndananê bînan de tepişteyî nêweşîye û îşkenceyî ra mirenê. Tepişteyan rê xokiştiş zî yeno ferzkerdene. Ganî ma teber de vera nê kerdişan û hetê keyeyanê tepişteyan de vengê xo vejê. Ganî ma bi taybetî seba tepişteyanê nêweşan têbigêrê. Reyna enflasyonî ra dima zîndanan de zî faturayî zêdîyayî. Pereyo ke erşawîyeno tepişteyan se ra 40ê ci sey bacî yeno girewtene. Nê wextê peyênî de pêro pereyo ke keyeyan şawito tepişteyanê xo, dest nîya ey ser.''