Cenevre de Mehkemeya Tirkîya (Tribunalê Tirkîya) de şahîd û mexdûrê binpaykerdişanê heqanê merdiman ameyî goşdarîkerdene. Mehkeme dima startê xebatanê Yewîya Ewropa (YE), Parlamentoyê Ewropa (PE) û Mehkemeya Laheyî da.

Na çarçewe de PE de roniştişêk ame kerdene.
Moderatora roniştişî û Sereka Komîteya Heqanê Merdiman a PE Marie Arena rejîmê Erdoganî rexne kerd. Endamê Komeleya Heqanê Merdiman a Ewropa û rojnameger Philppe Damî zî bale ante tepişteyanê sîyasîyan, tedayanê vera rêxistinanê komelê sivîlî û rojnamegeran ser û waşt ke Tirkîya biranê Mehkemeya Heqanê Merdiman a Ewropa bîyara ca.

Hetkara Hemserekanê Komeleya Heqanê Merdiman (ÎHD) Rahşane Bataray Saman pê rayîrê konferansê vîdeoyî tewra roniştişî bîye. Bataraye da zanayene ke OHALê 2016î ra nata bi taybetî Vakurê Kurdîstanî de binpaykerdişê pîlî qewimîyenê û bale ante tecrîdê Îmraliyî ser. Bataraye vat: ''Tepişteyê Îmraliyî Abdullah Ocalan, Omer Hayrî Konar, Veysî Aktaş û Hamîlî Yildirim nêeşkenê avûkat û keyeyanê xo bivînê.''

Raportor Lucas Perilli û Serekê Trîbunalê Tirkîya Prof. Dr. Johan Vande Lanotteyî zî pare kerd ke Tirkîya de îşkence bi hawayêkê sîstematîkî yeno caardene.

Raportorê Tirkîya yê Parlamentoyê Ewropa N. Sanchez Amorî îfade kerd ke Tirkîya de krîterê huqûqî nênê caardene û Tirkîya goreyê erjanê Yewîya Ewropa tênêgêrena. Amorî pê hesna ke raporê emserînî yê serê Tirkîya de pêşnîyazê musbetî do bêrê pêşkêşkerdene.

Endamê Parlamentoyê Ewropa Peter Van Dalenî ard ziwan ke Tirkîya vera Ewropa gefan wanena û ganî hînî qiseykerdişî ra fek bêro veradayene, raşta raşte Tirkîya bêra boykotkerdene. Dalenî vat: ''Ganî rejîmê Erdoganî bêro boykotkerdene, hesabê banka yê Erdoganî bêrê blokekerdene û Erdogan bêro vetene verê mehkemeyanê mîyanneteweyîyan. Ma zaf reyî nê çîyan ser o qisey kerd. Wextê qiseykerdişî qedîyayo.''