Hetêkî ra grevê vêşanîye yo ke vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan dîya destpêkerdene  dewam keno hetêkê bînî ra zî nêrazîbîyayîşî zêdîyenê.

Serekwekîla Grûbe ya HDPyî Merale Daniş Beştaşe babetê grevê vêşanîye, tecrîdê Îmraliyî, teda û hêrişanê vera HDPyî ANFyî rê ercnayî.

Beştaşe îfade kerd ke rixmê raporê CPTyî îqtîdar tecrîdê Îmraliyî de israr keno û vat: '' Mabênê rîzê zere û teberî yê Tirkîya û tecrîdê Îmraliyî de yew têkilîye esta. Tepişteyî prosesê pandemî û binê tedayanê zîndanan de grevê vêşanîye kenê ke qanûnî bêrê caardene. No zî asta rejîmê totalîterî eşkera keno. Verî netîceya grevê vêşanîye de tay sozî dîyayî la dima îqtîdarî bi hîşmendîya 'Ma çita biwazê ey kenê' tecrîd de israr kerd. Abdullah Ocalan vera grevê vêşanîye vejîyeno. La seba ke rayîr nêmendo tepişteyan birêka winasêne daye. Ma sey partî tim tecrîdê zere û teberî qebul nêkenê. Aseno ke tepişteyan hînî grevê vêşanîye ra ber çareyêke nêdîya.''

Beştaşe îfade kerd ke vatiş û kerdişê îqtîdarî seyci nîyê û wina dewam kerd: ''No îqtîdar biranê xo ra fek vera dano, bi pragmatîzmî têgêreno. Çunke ê girîngîye nêdanê huqûq, qanûn, şar, îradeyê şarî yan zî aramanîye. Ê têna berdewamîya îqtîdarê xo ser o vindenê. Îqtîdar bêîstîkrar oû pê ci bawer nêno kerdene.''

Merale Daniş Beştaşe babeta 'reformî' û hêrişê vera HDPyî vistî vîrî û vat: ''Heta ke no îqtîdar Tirkîya îdare bikero qîmetê qet yew reformî çin o. Oyo girîng vatiş nê caardiş o. Coka çew nêeşkeno pê vateyê reformî bawer bikero. Ê pê hêrişanê vera HDPyî dizdî, bêusûlî û sûcanê xo mîyan kenê. La HDP partîya şaran a û nê hêrişî do qet serkewtê nêbê.''