Konseya Rayberdişî ya Kongreya Neteweyî ya Kurdîstanî (KNK) 1ê sibata 2020î de merkezê xo yê Bruksel de kombîyayîşê xo kerd.

Kombîyayîş de rewşa sîyasî ya Kurdîstanî, rewşa Tirkîya, Îran, Iraq, Sûrîye û Rojhelatê Mîyanênî vurnayîşê rol û warê hemsengîyan ameyî ercanayene û analîzkerdene.

Beyannameyê peynî yê  KNKyî wina yo:

''Eşkera yo ke Rojhelato Mîyanên bi desan serrî yo ke mîyanê alozîyan de yo. Na rewşe wina kerd ke hêzê serdestî yê mîyanneteweyî yê mîyanneteweyî derbazê herême bîyî. Semedê serekî yê na alozîye zî rejîmê bêedaletî, dîkatorarî yê. Vera nê karan hînî şarê ma yê herême nêheqîyan qebul nêkeno, pêlê nêrazibîyayîşî û serewedaritişan zaf cayanê herême de ca girewt.  Alozîyê dewletanê îşxalkeran ê Kurdîstanî her ke şinê benê zêdêr û xorinêr. Dewleta tirke kewte mîyanê krîzanê sîyasî û ekonomîkî ya pîlan. Dewleta tirke estbîyayîşê xo çinkerdişê şaran ser o ronena. Dewlte tirke şarê kurdî û têgêrayîşê azadîye yê Kurdîstanî sey asteng verê nê xîretan de vînena. Têna Vakurê Kurdîstanî zî ney, Rojawan, Rojhelat û Başûrê Kurdîstanî zî seba nînan tehlukeyêko pîl ê. Hêrişê vera Rojawanî û Başûrî na rastîye mojnenî ra. Vera hêrişan û tedaya Tirkîya û hemkaranê aye têkoşînê kurdî û Kurdîstanî yê seba destvisnayîşê heqanê xo dewam keno. Heman wextî de meşrutîyetê şorişê Kurdîstanî roje bi roje dinya rê eşkerayêr û zelalêr beno. Bira Belçîka ya derheqê PKKyî de vengê serkewtişî ya. No serkewtiş û destkewtene seba şarê Kurdîstanî zaf pîl o.

Rejîmê Îranî mabênê mesele û krîzanê pîlan de yo. Bêşik nê krîzê pîlî û meseleyî tewr zaf Rojhelatê Kurdîstanî de xo mojnenê ra. Xirabîya rewşa ekonomîke, tepiştişî, îşkence û dardekerdişî dewam kenê. Bi taybetî zî rejîmê Îranî kolberê Rojhelatê Kurdîstanî ser o tedaya pîle keno. Kolberan tepişeno, qetil keno. Ma sey Kongreya Neteweyî ya Kurdîstanî dosyaya kolberan biresnê merkezanê mîyandewletan û dezgehanê heqanê merdiman.Rejîmê Îranî heta nika seba şarê Rojhelatê Kurdîstanî gamêke nêeşte. Dewleta Îranî de do vurnayîşê pîlî bêrê kerdene. Ganî têgêrayîşê azadîye yê Kurdîstanî xo seba na rewşe amade bikero. Ganî bi yewveng û yewrêzî hêvî bido şar û amadekarîya xo bikero. Eke wina nêbo, no firsend zî do destî ra şoro.

Başûrê Kurdîstanî bi temamî alozîye ra nêxelisîyaye. Hukmat nêeşka cewabê waştişanê şarî bido. Kiştişê cinîyan û şîdetê vera cinîyan dewam kenê. Hetê bînî ra îşxalê Tirkîya Başûrê Kurdîstanî de dewam keno. Tirkîya Başûr seba hêrişkerdişê şorişgêranê kurdan xebitnena. Ganî pêro dezgeh û sazgehê Başûrî vera na rewşa nêrazîbîyayîşê xo bimojnê. Hemleya boykotkerdişê malanê tirkan zaf girîng a. Ma sey KNKyî paştî danê na hemle. Kampa Mexmûrî de teda û zulm dewam kenê. Hetêkî ra Tirkîya Mexmûr bombarduman kena, hetêkê bînî ra zî Başûrê Kurdîstanî dormeyê ci girewt. Pawitişê şarê Mexmûrî wezîfeyê hukmatê herêma Kurdîstanî yo. Şengal zî bi heman hewayî hema zî birînanê xo ra dejeno. Hem Tirkîya hem zî DAÎŞ hêrişê ci kenê. Şengal wayîrê nasnameyêkê taybetî yo. Ma venga pêro şarê Kurdîstanî, terefanê Kurdîstanî danê ke Şengal bipawê.

Rojawanê Kurdîstanî de zî alozîye dewam kena. DAÎŞ sey fikr û hêzê terorîstî estbîyayîşê xo dewam keno. Îşxalê Tirkîya yê vera Efrîn, Şehba, Serêkanîyê û Girê Sipî dewam kenê. Prosesê vurnayîşê demografîyê na herême zî bi destê Tirkîya dewam keno. Ganî Îdareyo Xoser vera na rewşe xo xurtêr bikero. Armanc ganî no bibo ke îşxalê dewleta tirke bêro çinkerdene û pêro herêmî bêrê xelisnayene.Ganî şarê asûrî-sûryanî, keldanî û armenî yê Kurdîstanî hetê her parçeyê Kurdîstanî ra bêrê pawitene.Kombîyayîşê Konseya Rayberdişî ya KNKyî de kar û xebatê derbazbîyayeyî ameyî ercnayene, komîsyonan raporê xo pêşkêş kerdî. Bi armancê başêrerdişê kar û xebatanê ameyoxî zaf pêşnîyazî ameyî kerdene, plansazîya karî û xebatan ameye kerdene. Na çarçewe de bire ameye dayene ke karê dîplomasîyî do bêrê bihêzkerdene. Seba caardişê yewîye û yewrêzîya neteweyîye kombîyayîş, semîner û panelî do bêrê kerdene.''