Îstanbul de Newroza merkezîye do 23yê adare de do bêra fîrazkerdene. La qezayan de şayîyê Newroze yenê kerdene. Qezaya Beyogluyî ya Îstanbulî de taxa Haciahmetî de adirê Newroze ame tavistene.

Wekîlê DEM Partî Cengîz Çîçek û xeylê kesî tewrê şayîyan bîyî. Cinî û ciwanan eleqeyêko pîl mojna şayîye û dormeyê adirî de govende girewte.

Cengîz Çîçekî şayîye de qisey kerd û ard ziwan ke Newroza 2025î do seba şaran biba Newroza azadîye. Çîçekî da zanayene ke şarê kurdî 50 serrî yo têkoşînêkê rûmetênî keno. Çîçekî vat ke ê zaf rûmetên ê û kes nêeşkeno ziwan û nasnameyê înan înkar bikero.

Qiseykerdişê Çîçekî ra dima şayîye bi govende dewam kerd.