Serkêşîya DEM Partî û DBPyî de Amed de bi hezaran kesan rixmê astengîya polîsan zî vera destsernayîşî rayraşîyayîş kerd.

Hemserekê Pêroyî yê DBPyî Çîgdeme Kiliçgun Uçar û Keskîn Bayindir, îdarekarê wird partîyan, Hemşaredarê Amedî û temsîlkarê xeylêk dezgeh û rêxistinan zî tewrê rayraşîyayîşî bîyî. Girseyî bi sloganê ''Colemêrg ê ma yo'' dest pê rayraşîyayîşî kerd. Çalakîkeran tîşortê bi nuşteyê ''Qeyûm wa def bo'' xo rê dayî.

Polîsan dormeyê girseyî girewt. Girseyî ablûqa derbaz jerde û xo resna verê Şaredarîya Amedî.

Hemsereke Çîgdeme Kiliçgun Uçar tîya de xîtabê şarî kerd û pare kerd ke şarê Amedî serra 2016î ra nata vera destsernayîşî xo ver dano. Çîgdeme vat: ''Ma do nêverdê ke dewamê destsernayîşê şaredarîya Colemêrgî bêro. Ma do xo ver bidê. Ma tîya ra îqtîdarî rê vanê; îqtîdaranê ke kurdan peygoş kerdo dewam nêkerd. Vera kurdan her kes bin kewt la kurdî hema zî est ê.''

Hemserek Keskîn Bayindirî îfade kerd ke ê xoverdayîşê şarê Amedî yê seba Colemêrgî selam kenê. Bayindirî vat: ''Her bijî Amed. Ma soz da şarê Colemêrgî, ma do heta peynî xo ver bidê û apey gamêke nêerzê. Şarê kurdî do ancî derse bido îqtîdarî.''

Girseyî verê şaredarîye de govende girewte û vat ke ê do nobeta xo rê dewam bikerê.