Hûmara zîndananê tepişteyan Tirkîya kapasîteyê xo vîyarte û resaye 280 hezar kesan. Mîyanê tepişteyanê sîyasîyan de tewr tay 1333 tepişteyê nêweşî estê ke rewşa 400ê înan giran a. Hemserekê Federasyonê Komeleyanê Paştdayîşî û Huqûqî yê Keyeyanê Yepişteyan û Hukmweran ê Medî (Med TUHAD-FED) Mehmet Temîzyuzî rewşa tepişteyanê nêweşan ser o ANFyî reyde qisey kerd.

Temîzyuzî da zanayene ke babeta tepişteyanê nêweşan polîtîkayêka dewlete ya û vat: ''Ma zî xîret kenê ke meseleyê tepişteyan her tim rojdem de bibê. Seba ke meseleyêka komelkî ya ganî rêxistinê komelkî yê sivîlî pêro giranîye bidê naye ser. Temîzyuzî bale ante tesîrê hûmara zêde ya tepişteyan, meseleyanê hîjyenî, werdî, îşkenceyê fîzîkî, komelkî û psîkolojîkî ser û vat: ''Ma hetêkî ra wazenê çareyêkê tepişteyan ê nêweşan ra peyda bikerê, hetêkê bînî ra zî seba nêweşîyê neweyî mevejîyê werte xîret kenê ke şert û mercanê hewcedaran bivirazê. Muxatabê çareserkerdişê mesele hukmat o. Labelê hukmatî berê xo meseleyanê komelî ra girewtî. Bi muxalefetêkê xurtî ma eşkenê beranê girewteyan pêro abikerê. Seba ke rewşa tepişteyanê nêweşan giran a ganî ma zî giranîye bidê karê xo ser. Bêgûman şert û mercî seba tepişteyan zehmet ê, labelê ganî ma tepişteyanê nêweşan game bi game tesbît bikerê û goreyê naye plansazîya xo awan bikerê. Ganî CPT zî tede ma rêxistina efûye de pêvînayîşan bikerê.''