Kurdê ke Îstanbul de ciwîyenê vera xespkerdişê şaredarîyanê Kurdîstanî yê ke hetê şarî ra ameyî vijnayene nêrazîbîyayîş ramojna û waşt ke wa AKP hînî hêrişê xo yê vera kurdan biqêdîno.

Îpeke Tekîn: ''Bi qeyûman wazenê ke şar hêdî hêdî bimûso û naye sey çîyêkê normalî bivîno. Heme yew reye nêkene. Roje de yew qeyûm tayîn kenê û dest nanê îradeyê ma ser. La wa ê naye zaf hol bizanê ke heme şaredarîyan zî bigêrî vîjnayîş de ma do hemeyan peyser bigêrê. E se kenê wa bikerê  ê do bi zextî ser nêkewê.''

Ozleme Noyan: ''Hemşaredarî bîlasebeb yenê tepiştene û herinda înan de qeyûm yeno cakerdene. Eke wîna kenê ma vîjnayîş mekerê. Hewce nêkeno, xora ê kam wazenê wezîfe danê ey. No xestpkerdişê îradeyî yo. Ganî ma heme yew fekî ra biqêrî. Pêro pîya  vera na nêheqîye vengo berz bivejê. Çîyê ke ewro vera kurdan bênê siba do vera muxalîfanê bînan zî bibê. Coka ganî hema ke zaf  erey nêbîyo xoverdayîş bêro xurtkerdene.''

Ramazan Kirpinar: ''Badê kayê derbe dezgehanê demokratan ser a qeyûmî yenê caardene.  Qeyûm îradeyê şarê kurdî nas nêkeno. Ma zî êyê ke îradeyê ma nas nêkenê înan nas nêkene.''

Ozcan Alp: ''Qeyûm faşîzm o. Kesê ke hetê înan de nîyê sey dişmenî vînenî. Bitaybetî zî kurdan ra tersenê. Eke kurdî hêzê bifînî dest Tirkîya xo tehluke de vînena. Şarî hem zere hem zî teber de xapînenê û hêrişê kurdan kenê. Polîtîkaya HDPyî eşkera ya. Semedê demokrasî têkoşîn dana û seba naye tim raştê hêrişî yena.''