CPTyî ra dima Komîteya Mende ya Meclîsê Parlamenteran a Konseya Ewropa (MPKE) zî raporê xo de waşt ke tecrîdê Îmraliyî wa bêro wedaritene. Avûkatanê Buroyê Huqûqî yê Asrinî ra Îbrahîm Bîlmezî babete ANFyî rê ercnaye.

Bîlmezî îfade kerd ke nê raporî eşkera kerd ke dewleta tirke dewleta huqûqe ra binî ra bîya cîya û bingeyê naye de zî tecrîd esto.

Bîlmezî vat: ''Raporê CPT û MPKE mojnenê ke tecrîd hînî Ewropa de zî yeno nîqaşkerdene. Seba ke Tirkîya endama Konseya Ewropa (KE) ya ganî goreyê nê raporî têbigêra. Xora raporê MPKE mojneno ke Tirkîya derheqê caardişê heqanê merdiman û azadîye de vera apey şina.  Nê raporî eşkera kerd ke dewleta tirke dewleta huqûqe ra binî ra bîya cîya û bingeyê na bêhuqûqîye de zî tecrîd esto. Tirkîya neçare ya ke waştişê nê raporî bîyara ca. Eke wina nêkera do bibo rojdem ke Tirkîya sîstemê Konseya Ewropa ra bi temamî bêra vetene. Na rewşe zî sere de ekonomîk biba sebebê xeylêk alozîyan.''

Raporê CPTyî ra dima cade Rayberê Şarê Kurdî Abdullah Ocalanî rê qasê 6 mengan qedexeyê avûkatan dîya. Bîlmezî derheqê mesele de vat: ''No qedexe seba ma bêmantiq û bêmana yo. Hukmat herinda ke waştişê raporî bîyaro ca qedexeyê neweyî ardî ca. Bi nê hawayî Tirkîya CPTyî nêhesibnena. Coka no tewirê Tirkîya nîqaşan bikero zêdêr. Tirkîya bi nê qedexeyî bêhuqûqîya xo rê bahane dîye. 27ê temmuza 2011î ra heta nika têna serra 2019î de 5 reyan pêvînayîşê avûkatan qewimîyayî. No zî netîceya grevê vêşanîye de bibi. 7ê tebaxa 2019î pêvînayîşê peyênî ra nata her hewte muracatê ma yenê redkerdene. La nê xîretî do nêeşkê ke tecrîd meşrû û huqûqî bikero. Dezgehê Ewropa zî hînî raporanê xo de raştîye anê ziwan.''

Îbrahîm Bîlmezî qiseykerdişê xo wina dewam kerd: ''Mehkemeya Heqanê Merdiman a Ewropa (MHME) serra 2014î de bire daye ke cezaya muebede îşkence ya. Îmrali de zî her roje îşkence yeno kerdene. MHME têna seba dosyaya Ocalanî nê seba dosyaya yewna kesan zî na bire daye. Goreyê qanûnan her kes vera edaletî de têdûşt o. Coka Tirkîya neçare ya ke na bire bîyara ca. La hetê bînî ra Konseya Ewropa ya ke MHME pabesteya ci ya, kena ke xîretanê haştî û çareserîye yê muwekîlê ma krîmînalîze bikera. La nê kerdişê înan bîlasebeb ê. Peynîya peyêne de Birêz Ocalan do azad bibo û Tirkîya zî demokrasî û azadîye bivisna destî.''