Avûkatê Buroyê Huqûqî yê Asrinî Îbrahîm Bîlmezî derheqê tecrîdê vera Rayberê Şarê Kurdî Abdullah Ocalanî de cewab da persanê ajansê ma. 

''Seba esîrkerdişê Rayberê Şarê Kurdî çira Îmrali ame weçînayene?

No zîndan bi zanayîşî ame viraştene. Komployê 15ê Sibate de no zîndan nêm akerde bibi. Dima no zîndan teyna seba Abdullah Ocalanî şuxilîya. Birêz Ocalan Girawa Îmraliyî de her kesî ra ame îzolekerdene û tecrîdkerdene.

Heqê şima yê pêvînayîşî goreyê qanûn û duzennameyanê zîndanî est o?

Qanûnî vanê ke avûkatî eşkenê muwekîlanê xo de tim pêvînayîş bikerê. Ganî ma bieşkayêne her hewte mîyanê saetanê mesayî de Birêz Ocalanî zîyaret bikerê. La Îmrali de qanûnî nênê caardene. Statuyê Îmraliyî yo taybet zî seba bahane şuxilîyeno. Îmrali de her çarşeme ganî pêvînayîş do biameyêne kerdene. Îmrali de tecrîdî ra wetêr rewşêke est a. 43 mengî yo têkilîyêke çin a. Huqûq, qanûn, rewabîyayîş, wijdan pêro betal bîyî. Rewşa nikayêne asta tewr xirabe ya tarîxê Îmraliyî ya.

15ê sibata 1999î ra nata no senî ame caardene?

Ganî her serre ma 52 reyî pêvînayîş bikerdêne. La Îmrali de pêvînayîşê avûkatan o peyên 27ê temmuza 2011î de ame kerdene.15ê temmuza 2016î ra dima rewşa îstîsnayîye ameye îlankerdene. Naye ra pey pêvînayîşê bi keye û avûkatan heta 2019î ameyî qedexekerdene. 2019 de çalakîya grevê vêşanîye ra dima 5 pêvînayîşî ameyî kerdene. Dima pêvînayîşî ancî ameyî birnayene. 

Birê astengkerdiş û qedexekerdişî şima de senî yenê parekerdene?

2011 ra verî ma şîyêne Fermandarîya Cendirmeyan a Gemlîkî. 2011 ra dima rewşa îstîsnayîye reyde her 6 mengan de yew pevînayîşî ameyî astengkerdene. Ma hinî muracatê Dadgerîya Înfazî kerdêne. Ma tim waştêne ke wa birê qedexeyî û sebebê ci wa verî ma rê bivajîyê. La wina nêbeno.

Şima tim Komîteya Vergirewtişê Îşkenceyî (CPT) rexne kenê. Gelo CPT se nêkeno?

Ma tewirê CPTyî rexne kenê. CPT rewşa Îmraliyî ra hayîdar o la çîyêk nêkeno. CPTyo ke Îmraliyî zîyaret keno raporanê xo eşkera nêkeno. Ganî CPT derheqê zîyaretanê xo de agahîyan bido.

Komîteya Wezîran a Konseya Ewropa des serran ra dima ancî serrêke wext da ke wa Tirkîya heqê hêvîye bîyara ca. Gelo çira Komîte wextî rê verdana?

Mehkemeya Heqanê Merdiman a Ewropa (MHME) 2014 de bire dabî ke heqê hêvî bêra caardene. Dewleta tirke 10 serrî yo na bire nêarde ca. Komîteya Wezîran tim polîtîkayanê Tirkîya rê zemînêk awan kerd. Ma wina pawenê ke serrêke dima Komîte erkê xo bîyara ca.''