Binê tedaya şer û xizanîye de amadekarîya 1ê Gulane
Emser karkerê înşaatî seba 1ê Gulane xo amade kenê. Karkerî do vera şer û krîzî waştişanê xo yê ekonomîk û sîyasîyan waran de bîyarê ziwan.
DÎSK, KESK, TMMOB, TDB û TTByî mengêke verî 1ê Gulane Roşanê Karkeran ser o bernameyê xo eşkera kerdbi û seba 1ê Gulane veng dabi.
Konfederasyonan reyde xeylêk sendîka û rêxistinîyê demokratîkî zî seba 1ê Gulane veng danê. Serekê Pêroyî yê Sendîkaya Karkeranê Rayîr, Înşaat û Awanîyan a Şorişgêre ya DÎSKî (Dev-Yapi-Îş) Ozgur Karabulutî ANFyî rê qisey kerd.
Karabulutî îfade kerd ke ê binê tedaya şer, krîz û xizanîye de amadekarîya 1ê Gulane kenê û vat: ''Kedkarî bi xizanî, qesawetê serê cuye û vengîya mitbaxî amadekarîya 1ê Gulane kenê.Ma 1ê Gulane bi girseyan fîraz kenê. Waştişê ekonomîkî yê kedkaran, waştişê sîyasî û komelkîyî 1ê Gulane de vernî de ca bigêrê. Ez venga pêro karkeran dana ke vera xizanî, şer, tekperestî û bêkarîye vejîyê meydanan, vera îqtîdarî nêrazîbîyayîşê xo bimojnê.
Her ca de xora nêrazîbîyayîşî zêdîyenê. Têna karkerî nê cinî, wendekar, aktîvîstê xoza, roniştoxê taxan pêro kesî pê îqtîdarî qayîl nîyê. Coka nê 1ê Gulane de vera îqtîdarî şar vateyê xo vajo. Hêzê demokrasî amadekarîya ney kenê.''
