Rêxistina HDPyî ya Amedî  semedo ke tepişteyê nêweşî û tepişteyê ke cezaya înan qedîyayê vera nêdîyenê Parka Koşuyoluyî de eşkerayîyêke daye. Serekê Partîya Komunîste ya Kurdîstanî Sînan Çîftyurek û xeylêk temsîlkarê rêxistinanê komelê sivîlî zî tewrê eşkerayîye bîyî.

Hemserekê HDPyî yê Amedî Zeyat Ceylanî eşkerayîye de qisey kerd û bale ante ser ke her 24 saetan de 2 tepişteyê nêweşî mirenê û îqtîdar na mesele peygoş keno. 

Zeylanî vat: ''Polîtîkayanê AKP-MHPyî ra sebeb welat krîz de yo. Eke ma vera ney tewirê xo nêmojnê binpaykerdişê heqanê tepişteyan, tecrîd do bizêdîyê. Ganî hînî vengê haştîye berz bibo.  Eke ma verê polîtîkayanê îqtîdarî megêrê cezaya ci ma do biancê.''

Wexto ke Zeylanî qisey kerdêne polîsan xîret kerd ke girse bigêrê binê ablûqa. Girseyî pê sloganê ''Tepişteyê sîyasîyî rûmetê ma yê'' vera polîsan nêrazîbîyayîşê xo mojna.

  Hemsereka HDPyî ya Amedî Gulîstane Aksoy vera polîsan nêrazîbîyayîşê xo mojna û vat: ''Yeno waştene ke vengê sîyasetmedaranê kurdan ê tepişteyan bêro hişkerdene. La ma do vengê înan bidê eşnawitene.'' 

 Sînan Çîftyurekî zî îfade kerd ke ganî pêro pawitoxê demokrasî paştî bidê nobeta edaletî ya Baroyê Amedî û vat: ''Ewro dadîyî Baroyê Amedî de edaletî wazenê. Çar hetanê welatî ra dadîyî ameyî ke bigêrê edaletî. Çunke Tirkîya de edalet çin o.''