Merkezê tepiştişê multecîyan ê Korinthî yê Yunanistanî de multecîyo kurd Îbrahîm Ergunî semedê protestokerdişê şertanê tepiştişê multecîyan xo kiştbi.

Birayê Ergunî ke Fevzî Erguno ke Fransa de ciwîyeno ard ziwan ke ê xebera mergê birayê xo multecîyanê kampe ra girewte û vat: ''Birayê mi bîlasebeb 17 mengî yo tepişte bi. Mehkemeyî sey xapînayîşî ameyêne kerdene. Ma nika pabeyê raporê otopsî yê. No mergê ko normal nîyo. Eke birayê mi xo kişto zî ganî sebebê ci bêrê eşkerakerdene. Ça beno wa bibo keso/e ke zîndan de yo/ya cuya ci ra dewlete berpirsîyar a. Ma do peyê nayî cameverdê. Eke hewce bikero ma do heta Mehkemeya Heqanê Merdiman a Ewropa bêro.''

Yunanistan de menganê peyênan de Hukmatê Yenî Demokrasî yo raştgêrî polîtîkaya macîran giranêr kerde.

Rêxistina Yewîya Çalakîyan a Tirkîya/Kurdîstan eşkerayîyêke daye û polîtîkaya vera macîran şermezar kerde. Ewro saete 18:00 de hetê Yewîya Çalakîyan û anarşîstan ra do çalakîya protestoyî bêro kerdene.