Komeleya Huqûqnasan a Seba Azadîye (OHD), Weqfa Heqanê Merdiman a Tirkîya (TÎHV), Komeleya Heqanê Merdiman (ÎHD), Komeleya Huqûqnasanê Modernan (ÇHD) û Komeleya Komelê Sivîlî yê Sîstemê Înfazî (CISST) 14ê teşrîna verêne de Zîndanê Boluyî zîyaret kerdbi. Dezgehan zîndanî ser o raporêk weşana.

Rapor de dîya zanayene ke înan tepişteyan Nevzat Ozturk, Maruf Turkan, Erdal Tuncel û Hayatî Kaytanî de pêvînayîş kerdo. Rapor de ame parekerdene ke zîndan de 170 tepişteyê sîyasîyî est ê û nînan ra 4 kesî hucreyê yewkesî de manenê û ê bînî zî hucreyê hîrêkesî de manenê. Rapor de ame vatene ke dima ke mudirê zîndanî vurîyayo hewte de di reyî gardîyanî erzenê hucreyan ser, eşyayanê tepişteyan vila kenê, dest nanê înan ser, tepişteyan rê gefan wanenê û tepişteyan erzenê hucreyan.

Rapor de dîya zanayene ke aktîvîteyî yenê astengkerdene, saeta hewagirewtişî yena kêmkerdene, kincî 'yenê sînorkerdene', heqê ceyranî û werdî tepişteyan ra yenê waştene û vayê kantînî zî zaf ê.

Dezgehan da zanayene ke zîndan de 50 tepişteyê nêweşî est ê û nînan ra rewşa 20 tenan giran a. Dezgehan pê hesna ke tepişteyan vera nê kerdişan 30ê êlule de dest pê grevê vêşanîye kerdo û naye ra derheqê 136 tepişteyan de zî cigêrayîşê dîsîplînî dîyayo destpêkerdene.