Hemserekê Pêroyî yê Konfederasyonê Sendîkayanê Kedkaranê UmûmîyeMehmet Bozgeyîkî derheqê rewşa ekonomî de ANFyî rê qisey kerd. 

Bozgeyîkî doneyê enflasyonî yê TUÎKî û 'zêdînayîşê' meaşê kedkaranê umûmîye rexne kerd.

Bozgeyîkî vat: ''Pandemî de xeylêk merdimî bêkar mendî, hetê ekonomî ra qels bîyî. La îqtîdarî budçeya 2021î semedê terefgîranê xo, qesre û şerî amade kerde. Îqtîdar paştî dano polîtîkayanê neo-lîberalan, şer û sermaye. Eşkera yo ke 2021 de bêkarî û enflasyon do zêdêr bibê. Sebebê verênî yê krîzan zî polîtîkayê emperyalîst, şer, neolîberal ê. Seba ke krîzo ekonomîk û komelkî biqedo ganî Tirkîya de rewşa demokratîke bêra awankerdene. Ganî ma pêro bibê yew û seba naye têkoşîn bikerê.''

Bozgeyîkî eşkera kerd ke AKP bingeyê xo de bêbawerî virazeno û vat: ''Hûmara bêkaran resaye 10 mîlyon. La îqtîdar naye înkar keno û vano ekonomî beno pîl. AKP hînî bingeyê xo de zî bêbawerî virazeno.''

Bozgeyîkî ard ziwan ke îqtîdar bi taybetî Kurdîstan de polîtîkaya eda û faşîzane ano ca coka heta ke no krîzo sîyasal nêqedo krîzo ekonomîk zî nêqedîyeno. Bozgeyîkî vat: ''Xîretê Darbe yê 15ê Temmuze ra dima pê OHALan şaristananê kurdan de polîtîkaya teda ameye caardene. Qeyûman û KHKyan ra dima zî zaf kesî bêkar mendî. Kurdîstan de vera dezgehanê cinî, doman û ciwanan kerdişê xirabî estê. Semedo ke AKP sentezê 'turk-îslamî' xo rê kerdo esas na rewşe qewimîyena.''

Bozgeyîkî peynîya qiseykerdişê xo de pare kerd ke ganî vera îqtîdarî, polîtîkayanê antîdemokratîkan û sermaye têkoşîno hempar bêro kerdene.