Hemserekê Konfederasyonê Sendîkayanê Kedkaranê Umûmîye (KESK) Mehmet Bozgeyîkî derheqê Agahînameyê Serekkomarîye yê Tesarufî' de ANFyî rê qisey kerd.

Bozgeyîkî îfade kerd ke îqtîdarê AKPyî 20 serran de pêro çimeyê welatî kerdî taybet û pêşkêşê terefgîranê xo kerdî. Bozgeyîkî vat: ''AKP-MHP semedo ke payan ser o vinderê tesarufnameyo ke feydeyê ci çin o vila kenê. Agahîname de zî pêro malîyetî kedkaranê umûmîye ra yenê girewtene. Nê îqtîdarî çimeyê Bankaya Merkeze zî zûwa kerdî. 

Beşêko pîl ê budçeyê Tirkîya dîyeno polîtîkayanê şerî. Eke raşta zî ê wazenê tesaruf bikerê wa S-400, F-35 û hacetanê bînan ê leşkerîyan mehêrînê. Wa budçeyê welatî bêro dayene kedkaran û xebatkaranê nê welatî. Prosesê krîzê janî de 10 mîlyon kesî bêkar mendî. Waranê perwerde, weşîye û xeylêk waranê bînan de her roje mîktarê karkeran zêdîyeno. Şar, ciwanî û komel vera benê feqîr.''

Bozgeyîkî bale ante ser ke ganî karker, kedkar û şar vera polîtîkayanê şerî xeta têkoşînê hemparî awan bikerê û vat: ''Ganî şarê ma nê rijîyayîşî vindarnê. Rayîrê xelisîyayîşî demokrasî û haştîye, pawitişê ked û heqanê merdiman ê.''