Wekîla HDPyî ya Wanî û Endama Komîsyonê Bazirganîye, Enerjî, Çimeyanê Xozayîyan, Agahî û Teknolojî yê Meclîsî Muazzeze Orhan derheqê budçeya 2022î de ANFyî rê qisey kerd.

Muazzeze Orhan îfade kerd ke budçeya 2022î semedê Qesre, terefgîranê îqtîdarî û şerî ameye amadekerdene û vat: ''Merdimî vera benê xizan. Semedê weşîye û perwerdeyî budçe de barêka qije zî nêdîyaye. Karker, kedkarî mehkumê vêşanîye yenê kerdene. Cinîyî zî mîyanê na budçe de çin ê. Budçe de ca nêdîyeno şarî.''

Muazzeze Orhan vist vîrî ke budçeya Heyetê Asayîşê Milî yê Tirkîya, Wezîrîya Pawitişî, Wezîrîya Karanê Zereyî, MÎT, Asayîşê Qeraxan qasê 193.6 mîlyar o. Orhane vat: ''Qesre bi rayîrê na budçe xîret kena ke îqtîdarê xo rê dewam bikera. Bedçeya 2022î semedê îqtîdarî, sermaye û şerî ya. Rixmê her çîyî zî ma do payan ser o bibê. Ma do tim bibê vengê waştişanê karkeran, cinîyan, esnafan û ciwanan.''