Hemsereka Pêroyî ya HDPyî Pervîne Buldan: Agahîyê ke vanê Birêz Ocalanî heyetê CPTyî de pêvînayîş red kerdo, ma hîna zaf qerqilnenê. Ma pabeyê ci yê ke selahîyetdarî cade eşkerayîye bidê û CPT zî agahîyanê destê xo eşkera bikero.
Hemsereka Pêroyî ya HDPyî Pervîne Buldan kombîyayîşê Meclîsê Partîye de qisey kerd.
Buldane bale ante hêrişanê AKP-MHPyî yê vera Rojawanî ser û vat: ''Çend hewteyî verî Taksîm de hêrişêk ame kerdene. Persê serê nê hêrişî hema zî est ê. Werte de xeylêk hetê ke yewbînî nêtepişenê est ê. La îqtîdar kewto peyê serkewtişan.''
Buldane dima vist vîrî ke Rayberê Şarê Kurdî Abdullah Ocalanî ra xeberêke nêna girewtene û vat: ''3yê adara 2020î ra nata Birêz Ocalanî û tepişteyanê bînan ê Îmraliyî ra xeberêke nêna girewtene. Rixmê ney zî tecrîd vera beno xorinêr û goş nêdîyeno vengdayîşan. Tewr peyêne bi Ocalanî pêvînayîşê telefonî ame kerdene la telefon birîya.
Buroyê Huqûqî yê Asrinî vizêr pare kerd ke Birêz Ocalanî Îmrali de pêvînayîşê bi CPTyî red kerdo. Na agahîye ma hîna qerqilnayî. Ganî selahîyetdarî na babete de cade eşkerayîye bidê. Muxatabê ma dewlete û Wezîrîya Edaletî yê. Sey hemserekan ma seba pêvînayîşê Îmraliyî muracat kerdbi. La heta nika cewab nêdîya muracatê ma. Ganî îqtîdar û wezîr cade derheqê babete de eşkerayîye bidê.
Ganî CPT agahîyanê destê xo eşkera bikerê û mebê şirîkê nê kerdişanê îlegalan. Ma venga CPTyî danê ke heta ke babete zelal biba û muracatê avûkatan bêrê qebulkerdene ma sey HDPyî do xîretanê xo rê dewam bikerê.''
