Îzmîr de hetê Hêzanê Kede û demokrasî ra pê şîarê 'Seba demokrasî helmêk' Meydanê Gundogduyî de nawnayîşêk ame kerdene. Temsîlkarê Konfederasyonê Sendîkayanê Kedkaranê Umûmîye (KESK), Sendîkayanê Karkeran ê Şorişgêran (DÎSK), Yewîya Odayanê Tabîban, Yewîya Odayanê Muhendîs û Mîmaran (TMMOB), Hemserekê HDPyî Pervîne Buldan û Mîthat Sancar, Hemserekê DBPyî Salîha Aydenîz û Keskîn Bayindir û temsîlkarê xeylêk partî û dezgehan bi hezaran hemwelatîyan reyde tewrê nawnayîşî bîyî. 

Warê nawnayîşî de fotografê Denîze Poyraza ke hêrişê vera bînaya HDPyî de kişîyaye ameyî dardekerdene.  Nawnayîş de Şaredarê Îzmîrî yê CHPyî Tunç Soyer vejîya sehne ser û mesajê têkoşînê hemparî da. Serekê CHPyî yê Îzmîrî Denîz Yucel, Temsîlkarê DÎSKî Memîş Sariyî zî seba têkoşînê hemparî veng da.

Dima Pervîne Buldan qisey kerd û vat: ''17ê hezîrane de vera rêxistina ma hêriş ame kerdene. No hêriş vera pêro kurdan, cinîyan bi. No hêriş plankerde û serûberkerde bi. Ma reyna qirkerdişê Denîze Poyraz û hêrişê vera partîya ma şermezar kenê.  Hînî ganî no îqtîdar fam bikero ke meseleya kurdan nê welatî de çareser nêba qet yew meseleya bîne çareser nêbena. Tecrîdî wedarnê û meseleya kurdan çareser bikerê.''

Mîthat Sancarî zî vejîya sehne ser û bale ante armancê qirkerdişê Denîze ser. Sancarî vat: ''Ey guleyî têkoşîno hempar ê kurd û tirkan hedef kerd. ''

Vervatoxa Partîya Azadîya Komelî (TOP) Juliana Gozer zî ard ziwan ke HDP do bêveng nêbo û nêro bêvengkerdene.