Endama Heyetê Îmraliyî Pervîne Buldan derheqê pêvînayîşê bi Serekkomar Tayyip Erdoganî de ANFyî rê qisey kerd.Qiseykerdişê Buldane ra qismêk wina yo:

''Ma xeylê wextî yo pêvînayîşan kenê. La pawitişê perûne pêvînayîşê bi Birêz Serekkomarî bi. Bi nê pêvînayîşî rewşe bineyna bîye zelal. Çunke ey Heyetê Îmraliyî qebul kerd û ma pîya fîkrê xo bare kerdî. Ey hem ma goştarî kerd, hem zî pêşnîyazanê ma ser vindert û nuqtayêke ra wayîrê prosesî vejîya. Na babete de înan de zî qerardarîye bibî. Abdullah Ocalanî îradeyêk û qerardarîye fînaye werte. Ma eynî qerardarîye hetê îqtîdarî de zî dîye. Nê hetî ra pêvînayîşêko muhîm û tarîxî yo.

Ma nêpersayî qey o heta ewro prosesî ra dûrî vindert û ey zî çîyêk nêvat la ma texmîn kenê ke ey waşt averşîyayîşê prosesî bivîno. Hela ke dî proses aver şino kewt merkezê ci. Pêvînayîşanê bi Birêz Ocalanî de zabitname tepişyenê. Selahîyetdarê dewlete zî tewrê pêvînayîşî benê. Nê pêvînayîşan de çi yeno qiseyekrdene muhtemel o ke resenê serekkomar û îqtîdarî. Zaf problemî est ê. Qanûnê ke gerek bêrê vetene est ê. Ma yew bi yew nêhûmaritî la ma vat gerek zemîno qanûnî bêro pêardene. Ê zî na mesele de negatîf nêbî.

Ma bi xo waşt Wezîrê Edaletî dir pêvînayîş bikerê. Çunke gamê ke gerek bêrê eştene û qanûnê ke gerek bêrê vetene est ê. Xeylê meseleyî est ê. Ma wazenê înan sero munaqeşe bikerê û rayîrê xo de aver şirê. Ma cografya de ciwîyenê ke tede tehluleyî zaf ê. Ma na mesele de 2015 de veşayî. Narey  ma nêwazenê eynî aqîbetî biciwîyê. Coka çîyê ke benê sebebê qezayan ma wazenê verî ra werte ra wedarê. Eke ma lezabez Wezîrîya Edaletî dir pêvînayîş bikerê belka ma bi îstîşareyî ma qala çîyanê ke gerek bêrê kerdene kenê. Ê fîkranê xo vanê ma zî yê xo vanê. Dima ra partîyanê sîyasîyan û hetanê bînan de zî pêvînayîşî benê. Xora gerek ma şirê Îmrali û Birêz Ocalanî dir pêvînayîşê bikerê.Eke lezabez gamî bêrê eştene no proses çend aşman de bêro temam.

Eke heta hezîrane lazabez gamî bêrê eştene proses bêno temam. Eke qanûnî bêrê vetene, PKK xo fes bikero, eke şertê ci bêrê caardene kongre kom bibo û qerarê xo bigîro, eynî wextî de eke hetê îqtîdarî cepheyê xo ra çîyê ke hewce kenê bikero , qanûnî lezabez bêrê vetene o wext mîyanê çend aşman de no gure beno temam. Cepheyê ma de semedê qanûnê ke bêrê vetene xebatêke est a. Cepheyê îqtîdarî de zî xebatêke est a û ma nê nika eşkera nêkenê.

Têkoşînê înşakerdişê komelê demokratîkî çirey nêqedîyen. Yew cade qedîyeno û cayêkî bînî ra dest pê keno. Têkoşîn tim dewam keno. Vengdayîşê Haştîye û Komelê Demokratîkî xoser vengdayîşêkê têkoşînî yo. Komelkerdiş û vilakerdişê nê parçeyê nê têkoşînî yo.''