Bi hezaran kesan Îstanbul, Anqara, Adana, Colemêrg û Şirnex de adirê Newroze vist ta û şayîyan de vat: ‘’Ma peyê vengdayîşê Rayber Apoyî de yê. Ganî azadîya Rayber Apoyî bêra caardene.’’
Bi hezaran kesan Îstanbul, Anqara, Adana, Colemêrg û Şirnex de adirê Newroze vist ta.
Taxa Ormanî ya qezaya Geverî ya Colemêrgî de adirê Newroze ame tavistene. Ciwanan posterê Rayber Apoyî bi sloganê ‘’Bijî Serok Apo’’ akerd û merşê ‘’Çerxa Şoreşê’’ vat.
Taxa Gulbahçe ya qezaya Seyhanî ya Adana de adirê Newroze ame tavistene. Cinîyan kincê neteweyîyî dayî xo ra. Şayîye de bake ameye antene vengdayîşê Rayber Apoyî ser. Hemserekê DEM Partî yê Adana Seyfettîn Aydemîrî vat: ‘’Ma peyê vengdayîşê Rayber Apoyî de yê.’’
Qezaya Kuçukçekmece ya Îstanbulî de TJA bînaya DEM Partî de şayîyêke viraşte.
Cinîyan slogananê “Jin, Jiyan, Azadî” û “Newroz pîroz be” reyde govende girewte.
Anqara de HDKyî Zanîngehê ODTUyî de adirê Newroze ciwanan reyde tavist.
Qezaya Cizîre ya Şirnexî de bi beşdarîya Vervatoxa DEM Partî Auşegule Dogan, Wekîla DEM Partî Newroze Uysal û Hemşaredaran Gulere Yerbesan û Abdurrahîm Durmuş adirê Newroze ame tavistene. Şayîye de cinîyan bi meşaleyan adir geş kerd û deyîran reyde govende girewte.
