Qezaya Kadikoyî ya Îstanbulî de kombîyayîşê peynî yê Nobeta Edaletî de polîsan hêrişê girseyî kerdbî û merdimanê tepişteyanê nêweşan ra Zeynepe Calihana 60 serre bi îşkenceyî amebî destbendkerdene. Calihana ke îşkence ra bedenê ci mor û reş bibi, gerre kerd. Zeynepe Calihan derheqê babete de ANFyî rê qisey kerd.

Calihane vist vîrî ke dadîyanê tepişteyan 11 mengî yo Îstanbul de cayanê cîyayan de xîret kerdo ke vengê xo bidê eşnawitene la tim nê dadîyî ameyê destbendkerdene. Dayîke Zeynepe vat: ''Ma seba ke bibê vengê domananê xo yê tepişteyan, seba ke edaletî biwazê kom bîyî. La her hewte ma ameyî destbendkerdene. Kadikoy de 10 polîsanê sivîlan ez erdî ra kaş kerda, verçimikê mi şiknayî û da mi ro. Dima ez destbend kerda. Zereyê wesayîtî de zî polîsan da mi ro. Tay dadîyî nê îşkenceyî ra xo ra şîyî. Nêweşcaneyê Cigêrayîş û Perwerdeyî yê Hamîdîye yê Etfalî de doktoran pê kelemçeyan ma muayene kerdî. Ma waşt ke wa kelemçeyê ma bêrê akerdene la doktoran vat ke 'Şima kam ê ke ma şima bipawê.' ''

Calihana ke kênayêka ci newe vera dîyaya û aya bîne hema zî tepişte ya, da zanayene ke înan gerreyê polîsan kerdo. Calihane vat: ''Merdimî hê zîndanan de mirenê la îqtîdar ney rê vengê xo nêkeno. Ma sey dadîyan ney qebul nêkenê. Ma vera na bêvengîye Nobeta Edaletî dabî destpêkerdene. Tedawîya tepişteyanê nêweşan yena astengkerdene û înfazê tepişteyan yeno vêşnayene. Ma vera na bêhuqûqîye edaletî wazenê. Eke domana Wezîrê Edaletî zîndan de bibîyêne ey wina kerdêne. Teyna nameyê ci Wezîrê Edaletî yo, eleqeyê ey bi edaletî çin o.''

Calihane vist vîrî ke wird kênayê ci zî seba ke mîyanê HDPyî de sîyaset kerdêne tepişîyayê û kênayêka ci hema zî tepişte ya. Calihane îfade kerd ke ê do seba domananê xo tim têkoşîn bikerê û vat: ''Domananê ma se kerdo? Dizdîye kerda, çew kişto? Teyna înan sîyaset kerd. Ez heqê xo pawena û neçare ya ke tim bipawa. Seba ke kes heq nêdano ma, ma do heqê o bigêrê û heta peynî têkoşîn bikerê. Sey Emîne Şenyaşar heta edalet bêro caardene ma do Nobeta Edaletî rê dewam bikerê.''