Hemserekê Federasyonê Komeleyanê Paştdayîşê Huqûqî yê bi Keyeyanê Tepişte û Hukmweran (MED TUHAD FED) Kerem Canpolatî derheqê Vengdayîşê ‘Haştîye û Komelê Demokratîkî’ yê Rayber Apoyî de ajansê ma rê qisey kerd.

Canpolatî da zanayene ke vengdayîşê 27ê sibate wayîrê ê perspektîfî yo ke hem Tirkîya, hem Kurdîstan hem zî Rojhelatê Mîyanênî eleqedar keno û eşkeno krîzan çareser bikero. Canpolatî vat: ‘’No vengdayîş hêvîyêka pîle daye komelî. Armancê têkoşînê ma caardişê haştîye, vindarnayîşê şerî û gonîye yê. Birêz Abdullah Ocalanî wextêkê tengîye de na eşkerayîyêka pozîtîfe daye.’’

Canpolatî îfade kerd ke ganî dewlete cade gamanê pozîtîfan bierza û vat: ‘’’Dewlete hema gamêka pozîtîfe nêeşta. La Birêz Ocalanî gamêka pîle eşte. Ganî tena Ocalan ney terefo bîn zî seba haştîye game bierzo. Ganî dewlete cade game bierza. Ganî Birêz Ocalan azad bibo û prosesî îdare bikero. Heta ke wird terefî pîya game nêerzê proses do aver nêşoro. 

Eke haştîye ser bikewa do dewlete qezenç bikera. Coka ganî dewlete kurdan de dormeyê masaya de bêra pêser û meseleya kurdan çareser bikera. Ganî heqê kurdan zemînêkê qanûnî de bêrê dayene.’’

Canpolatî da zanayene ke seba serkewtişê prosesî ganî Rayber Apo azad bibo û vat: ‘’Dewlete bi xo qebul kena ke Birêz Ocalan lîderêk o. Eke Birêz Ocalan azad bibo û prosesî îdare bikero do her kes qezenç bikero. Dewlete bi xo Birêz Ocalan sey muxatabê resmîyî vînena. Ganî Birêz Ocalan cade azad bibo.’’