Endamê Yewîyanê Pawitişê Sîvîlî (YPS)Serkan Dîkmeyo ke 2016 de qezaya Geverî ya Colemêrgî de xoverdayîşê xoîdarekerdişî de şehîd bibi, cenazaya ci badê panc serran teslîmê keyeyê ci bîye.

Serkan Dikmeyo ke goristanê bêkesan de amebi definkerdene keyeyê ci 2016 de semedê girewtişê cenazaya ci Dezgehê Tipê Edlî (ATK) yê Erziromî de gonî dabî. Badê 5 serran 16ê kanûne de xebere dîyaye keyeyî ke gonîya înan yewbînan tapişta. Keyeyî vizêr cenazaya xo Erziromî ra girewt berde qezaya Ceyhanî ya Adana û Goristanê Ceyhanî de defin kerde. Destûr nêame dayene ke bê şarê keyeyî kesê bînî tewrê cenaza bibê.