Mehmet Alî Çelebî (70) 25 zîndan de mend û nêweşîya xo ya girane ra 25ê tebaxe de vera dîya. Çelebîyî wexto ke nêweşxane de tedawî bîyêne dinyaya xo bedilnaye. Cenazaya ey morgê Nêweşxaneyê Başakşehîrî yê Îstanbulî ra ameye girewtene û semedê merasîmî ameye berdene Cemxaneyê Erenlerî yê qezaya Esenyurtî. Wekîl û îdarekarê HDPyî, hemserek û îdarekarê MATUHAY-DERî û ANYAKAY-DERî zî tewrê merasîmî bîyî.

Dima cenaza Goristanê Çakmakliyî yê Buyukçekmece pê qerenfîlan ameye definkerdene.

Hemsereka MATUHAY-DERî Esîne Çelîk definkerdiş de qisey kerd û da zanayene ke rixmê raporanê Dezgehê Tipê Edlîyî tepişteyê nêweşî nênê veradayene. Esîne vat: ''Heta ke xeyalê Çelebîyî û ê bînan bêro caardene ma do têkoşînê xo dewam bikerê.''

Wekîla HDPyî ya Şirnexî Nurane Îmîr zî ard ziwan ke Çelebîyî tim vera faşîzmî têkoşîn kerd.

Merasîm pê sloganê 'Şehîdî nêmirenî' qedîya. Semedê Çelebîyî siba mabênê 11.00-17.00 de Rêxistina HDPyî ya Esenyurtî de şîn do bêro ronayene.