Çalakîya roniştişî ya ke semedê azadîya Rayberê Şarê Kurdî Abdullah Ocalanî çarçewa Hemleya 'Tecrîd, faşîzm û îşxalî rê bes o; wext wextê azadîye yo' de verê Ofîsê Neteweyanê Yewbîyayeyan (NY) yê Cenevre de 25ê çeleyî de ameye destpêkerdene, dewam kena.

Çalakîya nê hewteyî şexsê şehîdanê Werxelê de bi rêzgirewtişê semedê şehîdanê Kurdîstanî dest pêkerde. Hemsereka Merkezê Komelê Demokratîkî yê Kurdan ê Cenevre Bêrîvane Avci ya ke tîya qisey kerd bale ante çekanê kîyewîyan ê ke dewleta tirke vera gerîlayan şuxulnena ser û veng da dezgehanê eleqedaran ê Ewropa ke wa vera naye bêveng memanê. Hemserekê Merkezê Komelê Demokratîkî yê Kurdan ê Cenevre Salîh Saglamî zî ard ziwan ke dewleta tirke binê kontrolê NYyî de nê gazanê jehrinan şuxulnena û veng da înan ke wa hemparê nê sûcî mebê.

Endama Komîsyonê Dîplomasîya Tekîlîyanê Teberî yê TJK-E Asmîne Engîn zî ard ziwan ke ê seba ke heyetêko xoser şiro herême de derheqê çekanê kîyewîyan de cigêrayîşan bikero gurîyenê û vat ganî sere de NY dezgehê eleqedarî yê Ewropa berpirsîyarîya xo bîyarê ca.

Badê qiseykerdişan semedê tewrbîyayîşê çalakîya prostestokerdişê Komployê Mîyanneteweyî ya ke 8ê teşrîna verêne, saete 14:00 de do warê Helvetiaplatzî yê Zurihî de bêro kerdene,ame vengdayene.