Şewatê mabenê  qezaya Şemrexî ya Mêrdînî û qezaya Çinarî ya Amedî de 15 kesan dinyaya xo bedilnaye û bi desan kesî birîndarî bîyî. Goreyê Wezîrîya Zîret û Daristanî 924 heywanî merdî û 14 hezar û 900 hektar war vêşa bi wele.  Vera şewatî yo ke dewlete şar eşkera qederê ci rê caverda, nêrazîbîyayîşî hema dewam kenê.

Dewa Heberê ra Ferhane Erdema  ke merdimê ci şewat de merdî, ANFyî rê qisey kerd. Erdeme nê vatî: ''Bi serran o nê dewan de problemê ceyranî est ê. Ceyranê ma tim birîyeno. Seba ke tim ceyran şino, yeno malzemeyê ma yê ceyranin xeripîyenê. A roje serê sibayî ceyran birîya û heta şewe çînêbi. Dima ceyran veradîya û cade dewa ke kişta  ma de ya tede şewat vejîya. Şirîtanê ceyranî yê dewe de çîqî perayî û ê çîqî bîyî sebebê şewatî.  Dima ra zereyê 10 deqan de şewat resa dewa ma. Kesê ke semedê hewnakerdişê şewatî şîyî, înan ra yewî dînyaya xo bedilnaye. DEDAŞ ma perîşan kerdî, banê ma vêşnayî. Nika kam hesabê nê dano? Kam vano sûcê min o? No zî qîm nêkeno ma sûcdar kenê.

Eke ma kurd nêbîyêne wina nêkerdênê. Ma mergî rê caverdene.  Ne qiymetê ganê tutanê ma ne zî qiymetê heywananê ma est o. Vaşo ke herre de yo qiymetê ey zî çîn o. Merdimê ma merdî. Bi desan heywanê ma merdî, keda ma ya emserrî betal bîye. Na felakete ra pîle felakete est a? Ma hinî çi bicîwîyê? Merdimê ma verê çimanê ma de vêşayî. Dewê ma vêşayî. Adir kewt keyeyanê ma. Eke dewlete yew helîkopter bişawitêne, ê şewatî heta serê sibayî dewan nêkerdêne. Eke helîkopter bîameyêne hende merdimî nêmerdêne. Helîkopter nêameyî, îtfaîye erey ameye, gama ke ameyzî nêeşkayî warê darîstanî rê mudaxale bikero. Êyê ke şîyî kam do înan pêyser bîyaro?''

Dewa Kelekê ra Emîne Esen zî nê vatî: ''Gama ke şewat vejîya ma cade veng da îtfaîye. Şaredarîya qeza ra îtfaîye ame la leşkeran destûr nêda bikewo dewe. Ma bi saetan pawit, 10 kesan dinyaya xo bedilnaye, la îtfaîye cor de dîyaye pawitene.  Ma cehd kerd ke bi xo şewatî bikero hewna, ma kerd ke birîndaranê xo bixelisnê.  Çar kesan seba ke waşt birîndarn bixelisnê dinyaya xo bedilnaye. Ne merdim mendî, ne heywanî ne zî karitişê ma. Yew şewe de cuyeya ma serûbin bîye. Ma çî ciwîyayî, se bi nêzana. Qederê kurdan no yo. Felaketî tim ma vînenî. Şewat de zî seba ke ma kurdê çew wayîrê ma nêvejîya. Nêweşxane de hema nêweşî est ê. Rewşa tayînan giran a. Tutê qişkekî bêdadî bêbabî mendî, ciwanê ma şîyî. Kam do hesabê ci bido?''