Mêrdîn de yewê ci qoricî 3 kesanê bi nameyê Yakup A. û Çetîn T. û Suud O.bi hawayêkê sîstematîkî tecawuzê cinîyêka 22 serre kerd. La hîrê tecawuzkerî zî vera dîyayî. Aktîvîstanê Têgêrayîşê Cinîyan ê Azadan (TJA) qezayanê Kartal û Avcilarî yê Îstanbulî de bi eşkerayîye veradîyayîşê tecawuzkeran şermezar kerd. 

Avcilar de cinîyan pankarta 'Çeteyanê tecawuzkeran mepawe, muhakeme bikere' akerde û sloganê Jin, Jiyan, Azadî vat. Dadîyan çalakîye de laçîkê xo yê sipîyî zî eştî. Hemvervatoxa DBPyî ya Îstanbulî Gulîstane Aydin eşkerayîye wende. Aydine da zanayene ke vera cinîyan ê kurdan polîtîkayê şerê taybetî yenê caardene û vat: ''Ma nê polîtîkayan serebûtanê Îpeke Er û Gulîstane Doku ra zanenê. Mêrdîn de zî 3 tecawuzkerî vera dîyayî. Dosyayanê hêrişanê cînsîyan û şîdetî de eke faîlî kesê unîformakerdeyî bibê nêtepişîyenê.''

Kartal de îdarekarê HDP û Partîya Çep a Keske, Hemsereka GOÇÎZDERî Kamîle Kandal, endamê ANYAKAY-DER û MATUHAY-DERî û xeylêk kesî zî tewrê eşkerayîye bîyî. Hemvrvatoxa DBPyî ya herêma Marmara Dîlbere Demîr eşkerayîye wende. Girseyî waşt ke Warê Teyfîk Neyzenî de eşkerayîye bido û rayraşîyayîş bikero la polîsan bi bahaneya qedexeyî nêverda.  Cinîyan naye ser o bi sloganê 'Jin, Jiyan, Azadî' ver bi bînaya HDPyî ya qeza rayraşîyayîş kerd û tîya de eşkerayîya xo daye.