Bajarê Strasbourgî yê Fransa de ciwananê kurdan rojbîyayîşê 73. yê Rayberê Şarê Kurdî Abdullah Ocalanî de verê Parlamentoya Ewropa de çalakîye kerde.

Ciwanê ke verê   Parlamentoya Ewropa de ameyî têhet pê beyraqanê PKKyî kewtî zereyê bîna. Ciwanan bêvengîya Ewropa ya vera tecrîdî şermezar kerd û azadîya Abdullah Ocalanî waşte.

Ciwanan  na eşkerayîye daye: ''Ma verî rojbîyayîşê Rayber Apoyî pîzor kenê. Ma estbîyayîşê xo deyndarê Rayber Apoyî yê. 24 serrî yo Rayber Apo sîstemê îşkenceyî yê Îmraliyî de sey esîrî yeno tepiştene. Pê nê yeno weşatene ke heme kurdî bîgêrê binê esaretî. Ma pê na çalakîye sey ciwanan ê kurdan wazenê ke wa Ewropa sîyasetê leyminî yê vera Rayber Apoyî caverdê.  Heta azadîya Rayber Apoyî çalakîyê ma do dewam bikerê. Ma do tim xeta Rayber Apoyî de bi paradîgmaya ci têkoşîn bikerê. Sîyasetê xo yê bêhuqûqî caverdê. Kurdî do çirey verê şima de milê xo çewt nêkerê.''

Ciwanan dima ra bi slogana “Bijî Serok Apo”  xo pê rêzilan dêsanê baxçeyî ya girê da. Ciwanan waşt wa tecrîdê serê Abdullah Ocalanî bêro wedaritene û azadîya ci waşte. Dima ra polîsî pê meqesanê birnayîşê asinî, jop, gazê îsotî ameyî û hêrişê ciwanan kerd. Netîceya hêrişî de ciwanêk ame destbendkerdene. Ciwanan pê pankart û posteran çalakîya xo kuçeyanê Strasbourgî de domna. Çalakîye nizdê hîrê saetan kerde derg.