Ciwanî vera meseleya cayê mendişî çalakîyanê xo rê dewam kenê. Serekkomarê Tirkî Recep Tayyîp Erdoganî narey ciwanî kerdî hedef û înan rê vat 'zûrker.' Erdoganî îdîa kerd ke eleqeyê ciwanan bi wendekarîye çin o.

Ciwananê Sendîkaya Wendekaran ê ke Parka Yogurtçî ya Kadikoyî de çalakîya xo rê dewam kenê ANFyî rê qisey kerd.

Wendekara Zanîngehê Bogaziçi Armagane îfade kerd ke Hîsarustu de xeylêk wendekarî estê coka wayîrê keyeyan zaf kîra wazenê û vat: ''Semedê 2+1 yan zî 3+1 4 hezar lîra wazenê. Ma 2 hezar û nêm danê keyeyê 2+1. Ma keye de 3 kesî manenê. Ganî kîrayî bêrê sînorkerdene. Hûmara wargehan zî ganî bêra zêdekerdene.''

Wendekara Mamostatîya Îngilîzkî ya Zanîngehê Maltepe Cerene vat: ''Eke merdim nêeşko pereyan pêser bikero nêeşkeno keyeyêk tepişo. Hînî wargehê taybetî zî nêmendê ke ma peyda bikerê. Hetê bînî ra ma mejbûr ê ke bixebitê. Heqê cabîyayîşî heqo sereke yo. Ma heqê xo wazenê.''