Rojnameyê Yeni Yaşamî eşkera kerd ke înan semedê vîrusê Korona ra ke Kurdîstan û Tirkîya de bi lezî vila beno çapkerdişê xo vindarna.

Rojnameyî bi eşkerayîyêke da zanayene ke rojname do înternet de sey pdf bêro weşanayene. Eşkerayîya rojnameyî de ame vatene ke ê xo sey berpirsîyar hîs kenê ke çapkerdişê rojnameyî vindarnê û wexto ke rewşa weşêre bêra meydan ê do çapkerdişê rojnameyî dewam bikerê.

Peynîya eşkerayîye de rojnameyî nê çîyî pare kerdî:

''Wexto ke şertê başêrî bêrê werte ma reyna û bi hawayêkê hêzêrî do verê şima de bibê. Domanê Apê Musayî qet ca nêverdenê, karê ma yo eslî 'ma bi xêr dî' yo. A roje do bêra. Ma reyna kaxitan reyde şima zî rojnameyê xo reyde do bêrê têhet.''