Tîma Awankerdişê Haştîya Komelkîye (Christian Peacemaker Teams-CPT) bi raporêkî aşmêke ya hêrişanê dewleta tirke eşkera kerde.

Goreyê raporî destpêkê hêrişan 15ê hezîrane ra nata Başûrê Kurdîstanî de 9 dewî bi temamî ameyê xalîkerdene û tewr tay 184 keyeyî ameyê koçberkerdene. Rapor de dîya zanayene ke hêrişan de 68 hezar donim erazîyê zîretî ameyê vêşnayene, zerar dîyayo 19 bananê sivîlan, 2 projeyanê awe, wesayîtêk, kargehêk û xetanê ceyranî. 

CPTyî pare kerd ke netîceya bombardumananê Tirkîya de bi taybetî Amedîyê û Batîfa de erazîyanê zîretî zerar dîyo. CPTyî pê hesna ke 15ê hezîrane ra heta nika Amedîyê tewr tay 45 reyî dîyaya bombayan ver.

CPTyî vat: ''12ê temmuze de şiwaneyê bi nameyê Nêçîrvan Hekîm hêrişê vera Sîdekanî de birîndar bi. Hêrişan ra torrê telekomunîkasyonî birîyayî û dewijan rê mesajê 'Şima xêr ameyî Tirkîya' erşawîyayî. Dewleta tirke Herêma Kurdîstanî de wayîra 74 baregehan û qereqolan bibî, nika desnê baregeh û qereqolî viraştî. Nînan ra diyê ci herêma Nihêlî ya Amedîyê de, hewtê ci herêma Batîfa ya Zaxoyî de û yewê ci zî herêma Sîdekanî ya Soran de virazîyayê. Dewleta tirke şewan di noqtayê kontrolî yê demkîyî zî awan kerdî.''