Cigêrayoxê kurdî Azîz Akin (67) hewteyê vîyarteyî de dinyaya xo bedilnabî. Akin dewa Botaşî ya qezaya Farqînî ya Amedî de ame definkerdene.

Birayê Akinî hunermend Cewad Merwanîyî qala Akinî ANFyî rê kerde.

Merwanîyî pare kerd ke birayê ci 1993 de amebi destbendkerdene û vat: ''Birayê mi wexto ke ame destbendkerdene mengêke ma tira xebere nêgirewte. Ma vatêne qey dewlete a qetil kerda û eşto cayêk. Wextê nezaretî de ci rê îşkenceyêko giran amebi kerdene. Ey serranê 90an de vera Hîzbulkontra û dewlete bi serran têkoşîn kerd, sere wedarna.

Birayê mi dewaya PKKyî ra 16 serran zîndan de mend. Wexto ke tepişîyabi ciwan bi la zîndanî ra nêweş vejîya. Ey zîndan de zî têkoşînê xo rê dewam kerd. O key zîndanî ra vejîya agêra Farqîn. Wexto ke birayê mi tepişîyabi hîzbulkontrayî dest nabi mal û mulkanê ma ser. La birayê mi wexto ke zîndanî ra vejîya mal û mulkê ma apey girewt. Zîndanî ra dima nêweşîyê  ci bîyî giranêr. Wexto ke kongreya HDPyî ya Amedî ra agêro vato sereyê ci zaf dejeno. Xora dima gonîye şîya mezgê ci. 6 rojan nêweşxane de mend.

''Birayê mi zaf îşkence dî, zîndan de mend la qetî têkoşînê xo ra fek vera nêda. Pêro emrê xo de ey vera dewlete sere wedarna. Emrê ci pê têkoşînî derbaz bi.''

Seba Azîz Akinî roja yewşemeyî mabênê saete 12.00-18.00 de Merkezê Komelê Demokratîkî yê Dusseldorfî de do serweşîye bêra qebulkerdene.