Berpirsyarê Merkezê Cigêrayîşanê Stratejîkan ê Fîlîstînî û Pîsoporê Rojhelatê Mîyanênî Zaîd Youbîyî derheqê hêrişanê vera Rojawanî de cewab da persanê ANFyî.

Youbîyî ard ziwan ke vera Rojawanî hêrişê zaf hetin yenê kerdene û amacê hêrişan wina ercnayî: “Ma hêrişanê dewleta tirke yê vera Rojawanî têna sey hêrişan nêgênê dest. Sey îşxalî yenê hesibnayene. Îşxalo ke keno kenê îstîkrar û hûzûrê herême bixeripno. Pê nê îşxalîî yeno waştene ke îradeyê kurdan ke ûca ameye desfînayene bêro eciqnayene. Îşxal têna vera kurdan nê vera heme herême yo. Erdogan wazeno heqanê herême bieciqno. Erdogan pê nê hêrişan keno ke DAÎŞî newe ra bikero ganî. Cayo ke çeteyê DAÎŞÎ tede yenê tepiştene hêrişê asayîşê ucayan keno. Eke hêrişê vera Rojawanî ser bikewê, grûbê radîkalî yê terorîstan ê sey DAÎŞî do nefes bigêrê. DAÎŞ do bibo belayê heme dewletan û Rojhelatê Mîyanênî de zî têmîyanewtiş vejîyo.”

Youbî derheqê tewirê dewletanê sey Amerîka de nê vatî: “Amerîka hetêkî ra vana ê vera nê hêrişan ê û hetê bînî ra vana ê qisawetê Tirkîya fam kenê. Na rewşêka tehlukeyin a. Na çilaya hewz a ke kurdan dahîna zaf mirnena. Rojawanî ra heta Iraqî her kesî mirnena. Çunke Erdogan hêrişê her cayî keno. Semedê hêrişê vera nê hêraman Erdoganî binê masa ra tay dewletan ra çilaya hewze girewta. Wina qeydê nê dewletî zî binpaykerdişî kenê. Ganî rayapêroyîye cade mudaxale bikero, şiro Tirkîya ser ke Erdogan hêrişê vera Rojawanî vindarno. Rêxistine heqan, yewîyê ereban, hêzê mîyanneteweyîyî ganî vera nê îşxalî vinderê. Erdogan têna hêrişê kurdan nêkeno. Hêrişê Sûrîye, Iraq, Misir û Libya keno. Coka no projeyê îşxalî yo. Ganî cade vera nê bêro vindetene. Hêrişê ke inkey hetê Tirkîya ra yenê kerdene, binpaykerdişê qanûnanê mîyanneteweyîyî yê.”

Youbîyî vat: “Erdogan wazeno mabênê xo bi welatênê ereban bikero helo la camîaya ereban sey yew îşxalker, kiştoxî ewnîyena Erdoganî ra. Camîaya ereban ganî vera îşxalê tirkan tewir bigêro. Erdogan zî sey Îsraîlî yew dişmen o. Komelê ereban paştî dano dewaya kurdan. Erdogan kiştoxê seserre yo. Semedê heme dinya tehluke yo.Ganî Erdogan mehkemeyanê mîyanneteweyîyî de bêro muhakemekerdene û tira hesab bêro persayene.”

Zaid Al Youbi têkoşînê kurdan pîroz kerd û qiseykerdişê xo wina qedîna: “Kurdî sey tunelî verê îşxalî genê. Coka ganî ma paştî bidê kurdan. Îsraîlî her çîyo ke Fîlîstînî rê kerd, Tirkîya zî vera kurdan kena.  Ma sey şarê Fîlîstnî paştî danê kurdan. Wayîrê dewaya kurdan vejîyenê. Kam ke azadîye wazeno, her welatperwer, kam ke tehlukeyî vîneno ganî vera nê îşxlaî vejîyo. Vera îşxalî ganî ma wayîrê dewaya kurdan vejîyê, dormeyê QSDyî de bêro têhet. QSDyo ke vera DAÎŞî têkoşîn kerd ganî dinya de sey modelê têkoşînê vera terorî bêro destgirewtene. Kurdî inkey têna semedê kurdan nê semedê heme herême ganê xo feda kenê. Têkoşînê kurdan serpilik de yo. Ma nê têkoşînî pîroz kenê. Ma pê bawer ê ke kurdî do vera hêrişan vinderê û îqtîdarê Erdoanî birijnê. Ez Kudusî ra bi nameyê şarê Filistînî veng dana kurdan; şima têna semedê xo nê semedê heme dinya şer kenê. îradeyê şima, têkoşîn û xoverdayîşê şima semedê heme dinya îlham o.”