Endamê Komîteya Rayberdişî ya PKKyî Murat Karayilanî bernameyêkê taybetî yê Stêrk TVyî de Hemleya 1ê Hezîrane, ablûqaya vera Mexmûrî û weçînayîşê Tirkîya ercnayî. 

Qiseykerdişê Karayilanî ra tay noqtayê girîngî wina yê:

''Hemleya 1ê Hezîrane dewamê Hemleya 15ê Tebaxe bîye. Hemleya 15ê Tebaxe verê qirkerdişê kurdan girewt û çareserîya meseleya kurdan kirişte masa la dima Komployo Mîyanneteweyî qewimîya. Hemleya 1ê Hezîrane zî verê zerar û tesîranê Komployê Mîyanneteweyî girewt û seba çareserîya meseleya kurdan rolêko tarîxî kay kerd. Komployê 1999î ra dima têgêrayîşê ma adirbirnayîş îlan kerd û heta 2004î çalakîye nêkerde. O çax Rayber Apoyî zî Îmraliyî ra paradîgmaya çareserîye vete werte. La dewleta tirke hêrişanê xo rê dewam kerd û çareserîye red kerde. Ma vera nê tewirê dewlete û xeta tasfîyekere 1ê hezîrana 2004î de Hemleya 1ê Hezîrane îlan kerde.

Çalakîyanê ma ra dima 2005 de Erdoganî Amed de wead kerd ke meseleya kurdan çareser bikero. 2006 de ma adirbirnayîş îlan kerd, 2008 de pêvînayîşê Osloyî qewimîyayî. 2009 de weçînayîşan ra dima ma reyna adirbirnayîş îlan kerd. La seba ke dewlete reyna xo nêzdîyê çareserîye nêkerd ma 1ê hezîrana 2010î de hemle aver berde. 19 serrî yo Hemleya 1ê Hezîrane dewam kena. Hemleya 1ê Hezîrane ra nêbîyayêne Komployo Mîyanneteweyî ser kewtêne û têgêrayîşê ma tasfîye bîyêne.

Hemleya 1ê Hezîrane reyde şerê gerîlatîye zî ame newekerdene, şerê erazî ame averberdene, ruhê fedayîtîye vejîya werte û her çî ra ver şerê binerdî ame afernayene. Reyna çarçewa Hemleya 1ê Hezîrane de gerîlayan hêzê hewayî ronayî. Ma bi taybetî di serranê peyênan de Zap de netîceyê nê metodan dîyî. Dişmen nika Zap de nêeşkeno gamêke zî bierzo. Gerîlayan zî mojna ke ê do qetî nêrê binvistene.

Ma çapemenîye ra eşnawit ke artêşa Iraqî kena ke dormeyê Mexmûrî bigêra. Aseno Iraq waştişê dewleta tirke ser o wina têgêreno. Dewleta tirke kena ke Iraqî têmîyan bikera. Ganî dewleta Iraqî goreyê waştişanê dewleta tirke tênêgêra. Yew meseleya şarê Mexmûrî bi Iraqî çin a. Şarê Mexmûrî vera DAÎŞî şer kerd û rûmetê pêro Iraqî pawit. Kampa Mexmûrî kampa multecîyan a. Mexmûr de wextê hêrişanê DAÎŞî de tay hêzê ma uca de seba pawitişê şarî cabibî. La dima zafê înan agêrayî. Nika uca de hêzêkê ma yo qij est o. Eke hewce bibo ma do înan zî apey biancê. Ma nêwazenê şarê ma yê Mexmûrî rewşa zehmetî mîyanî de bimano. Eke dewleta Iraqî û Neteweyê Yewbîyayeyî soz bidê ke ê do şarê ma bipawê ma cade venga hêzanê xo danê ke Mexmûrî ra vejîyê. Ma pê bawer ê ke dewleta Iraqî goreyê vatişanê Tirkîya tênêgêra û meseleyan pê dîyalogî çareser bikera.

Weçînayîşê 14ê gulane û 28ê gulane edîl û têdûşt nêbîyî. Çew nêeşkeno vajo ke nê weçînayîşî meşrû bîyê. Şarê ma weçînayîşan de tewirê xo mojna û demokrasî û vurîyayîş waştî. Wa her kes bizano ke seba ke raqîbê Erdoganî (Kemal Kiliçdaroglu) kurd û elewî yo nêeşka hende rayan bigêro û bibo serekkomar. Dewlete reyna Erdogan kerd serekkomar. Erdoganî propagandaya xo zûran ser o naya ro, nîjadperestîye ser o şovenîzm kerd. Seba ke nasnameyê ey hetê dewlete ra ameyo redkerdene Kiliçdaroglu nêame weçînayene. 

Hetê bînî ra tay xeletîyî zî est ê; turê diyînî de muxalefetî goreyê propagandayanê AKPyî terzê xo vurna û kerd ke bi nîjadperestîye netîce bigêro. Muxalefetî zî sey AKPyî vera kurdan tewir girewt. AKPyî weçînayîşan de zûrî kerdî, montajî kerdî. Mîsal vîdeoyê mi zî wina ame montajkerdene. Axir Erdogan bi nê hawayî ame weçînayene. 

Şarê ma rixmê hêrişan, tedayan û hîleyan zî sey her wextî bi qerardarî tewir girewt. Ma nê tewirê şarê xo ra hêz gênê. Dewrê neweyî de têkoşînê demokrasî û azadîye yê şarê ma do geşêr bibo. Ma zî xo vera her tewirê hêrişî amade kenê. Ma rê çareserîya meseleya kurdan esas a. Seba ney zî demokrasî lazim a. Partîyê sîyasîyî ney dewlete muxataba çareserîya meseleya kurdan a. Qet yew partîye dişmena ma nîya. Dişmena ma dewlet a. 

Ma her çî rê yanî şerî rê amade yê. Dewlete 100 serrî yo kena ke meseleya kurdan pê şer, qirkerdiş û çinhesibnayîşî biqedîna. Bi taybetî nê 8 serranê peyênan de îtîfaqê AKP-MHP-Ergenekonî vera ma hêrişanê giranan keno. Ewro şarê kurdî, PKK, Rayber Apo û gerîlayî raştîyê nê welatî yê. Çew nêeşkeno nê raştîyan pê şerî biqedîno. Ma do bi xoverdayîşê xo tim şarê xo bipawê. Senî ke ma heta nika dişmen vindarna naye ra pey zî do ser bikewê.

Nê esasî ser o ez venga cinî û ciwananê kurdan dana ke tewrê xebatanê rêxistinîye bikerê, verê xo bidê refanê gerîlayan. Dişmen ciwananê kurdan ra terseno coka her ca de hêrişê înan keno. La hînî çew nêeşkeno verê înan zî bigêro. Serkewtiş do ê kurdan, ê ma û şarê kurdî bibo.''