Zîndanê Bafra yê Samsunî de Emîr Karakumo 30 serreyo ke hucreyê yewkesî de tepişîyeno 3 mengî yo bi waştişê muhakemebîyayîşê edlîyî û vera îşkenceyê sîstematîkî yê gardîyanan grevê vêşanîye keno.

Dadîya Emîr Karakumî Bîrsene Karakum ANFyî rê qisey kerd û da zanayene ke lajê ci pê îfadeyanê şahîdê nimiteyî tepişîyayo û vat: ''Ez 26ê nîsana 2022yî de şîya zîyaretê lajê xo, bedenê ci de rêçê îşkenceyî est bîyî. Lajê mi vat 25ê nîsane de 8 gardîyanan hêrişê ci kerdo û o nêberdo nêweşxane. Ez û mêrdeyê mi ma waşt ke îdareyê zîndanî de îşkenceyî ser o qisey bikerê la îdareyî qebul nêkerd. Ma muracatê Serdozgerîya Komare ya Bafra kerd, dima lajê mi wedarîya nêweşxane la raporê 'rêçê îşkenceyî çin o' dîyayo ci. Temmuze de zî zîyaretê mi de gardîyanêk ame û pêvînayîşê ma nême ra birna. Dima ez musaya ke no gardîyano oyo ke lajê mi rê îşkence kerdo.''

Bîrsene Karakum pare kerd ke dosyaya lajê ci Îstanbul de ya û înan waşt o sewqê Zîndanê Sîlîvrî bibo la waştişê înan nêameyo qebulkerdene. Bîrsene Karakum îfade kerd ke lajê ci 6ê hezîrana 2022yî de pê waştişê muhakemebîyayîşê edîlî dest pê grevî kerdo û la hema zî îşkenceyê vera ci dewam keno.

Bîrsene Karakum dîyar kerd ke 9 mengî yo ê muracatê Wezîrîya Edaletî û Dozgeran kenê la vengê înan nêeşnawîyeno. Bîrsene vat: ''Mi de tansîyon û şeker est o la seba lajê xo, mi xo ra fek vera dayo. Ez têna wazena lajê mi teber de bibo. Wa hînî peynîya nê îşkenceyî bêra û lajê mi bi edîlane bêro muhakemekerdene.''