Hukmatê Danîmarka 24ê teşrîna verêne de qanûnêk parlamentoyî ra vet ke bi nê qanûnî kesê ke seba asayîşê welatî tehlûke yê hemwelatîye ra bêrê vetene.

Qanûnê bi nameyê ''Qanûnê Lezabezî'' heq dano Serekîya Ecnebîyan û Entegrasyonî ke kesê ke tewrê DAÎŞî û rêxistinanê cergan bîyî do hemwelatîye ra bêrê vetene. Serekê Ecnebîyan û Entegrasyonî Mattias Tesfaye pare kerd ke 2 DAÎŞijî hemwelatîye ra ameyî vetene. Tasfayeyî derheqê qanûnî de vat: "Ez kêfweş a ke qanûn ame caardene." Tasfayeyî vat ke kesê ke hemwelatîye ra ameyî vetene eşkenê mehkeme de îtîraz bikê.

Rojnameyê Berlingske Tidenge vat nê di kesan ra yew hemwelatîyê Tirkîya yo ke nameyê ci S.K. yo û verê cû tewrê DAÎŞî bi, sucê terorî kerd û nê sucî ra ame mehkumkerdene. S.K.yî 2013î de Radio24syv reyde qisey kerd û vat sînorê Tirkîya ser o tewrê DAÎŞî bi ke vera kafiran şer biko. S.K. hetê înterpolê Danîmarka ra ameyêne gêrayene la Tirkîya o nêtepişt. S.K. hema zî Tirkîya de yo. Seba ke abigêro Danîmarka xîret kerd ke pasaport bigêro la Danîmarka pasaport nêda ci. Hukmatî û Partîya Şarî ya Danîmarka pêkerd ke domanê DAÎŞijan zî hemwelatîye ra bêrê vetene. Nika zî tay partîyî wazenê ke domanê DAÎŞijan ê ke Danîmarka de bîyî zî hemwelatîye ra bêrê vetene.