Serekê Baroyê Amedî Nahît Erenî derheqê cînayetê Tahîr Elçîyî de ANFyî rê qisey kerd.

Nahît Erenî îfade kerd ke dezgehê muhakemekerdişî yê Tirkîya derheqê cînayetê Tahîr Elçîyî de mesuldarîyanê xo nêanê ca û vat: ''Îqtîdarî semedê zelalkerdişê nê cînayetî tewirê xo nêmojna. Coka cayê serebûtî de cigêrayîş nêame kerdene. Dîmenê kamerayê cayê serebûtî zî vînîbîyaye yê.''

Erenî eşkera kerd ke raporê Beşê Mîmarîya Adlîye yê Zanîngehê Londonî ra dima reya verêne polîsanê vergumanan îfade dayo û vat: ''La reyna zî dosya ameye manîpulekerdene, no îdîaname ameyo amadekerdene. Şahîdanê serebûtî verî vatbi ke endamanê rêxistine Elçî kişto la dima înan mehkeme de vat ke înan tedaya mehkeme ra îfadeyo winasên dayo. Şahîdan îfadeyê xo yo verên bi hawayêkê nuştekîyî înkar kerd.''

Nahît Erenî ard ziwan ke Serekwezîrê ê çaxî Ahmet Davutoglu mesuldaro sîyasî yê cînayetê Elçîyî yo û vat: ''Wextêkî verî Davurtogluyî ma zîyaret kerdbî û vatbi 'No suîkastêkko sîyasî yo.' Kişîyayîşê Elçîyî ra dima ma kewtî prosesêkê tarî. Qedexeyê tebervejîyayîşî, tedayê vera merdiman ameyî kerdene û bi seyan merdimî kişîyayî. Coka vateyê suîkastî de zaf manayî estê. Ganî Davutoglu qestê nê vateyê xo eşkera bikero. Keyeyê Elçîyî, avûkatanê ci û Baroyê Amedî zî mehkeme ra waştbi ke wa Davutoglu îfade bido la heta nika nê warî de çîyêko zelal nêame vatene.''