Dayîkê Haştîyê yê ke xeylêk bajaranê cîya cîyayan de semedê azadîya Rayberê Şarê Kurdî Abdullah Ocalanî Nobeta Edaletî tepişenê, verê meclîsî de eşkerayîya çapemenîye daye.

Serekwekîla Grûba Meclîsî ya DEM Partî Gulîstane Kiliç Koçyigit û Vervatoxa Meclîsê Cinîyan Halide Turkogulu zî tewrê çalakîye bîyî.

Halide Turkoglu vat, ''Dayîkî seba ke Wezîrê Edaletî reyde pêvînayîşî bikerî ameyî tîya la înan ra ameyo vatene ke wezîr tîya de nîyo. Seba ke pêvînayîş nêame kerdene ma do dosyaya dayîkan teslîmê hetkarê Wezîrê Edaletî bikerê. Dayîkî wazenê ke semedê ameyîşê haştîye wa tecrîdê serê Birêz Ocalanî bêro wedaritene û waştişê xoverdayoxanê zîndanan bêrê caardene.  Ganî heme welat goş bido vendayîşê dayîkan. Ganî paştdayîş bêro xurtkerdene.''

 Hamdîye Kiriciya ke bi nameyê Dayîkanê Haştîye qisey kerd nê vatî: ''Ma verî Rayraşîyayîşê Azadîye yê Pîlî yo ke do mabênê 1-15ê sibate de semedê wedaritiş tecrîdî bêro kerdene, selam kenê. Adara 2021î ra nata Birêz Ocalanî ra qet xeberêke nêameya girewtene. Ganî tecrîdo giran cade bêro wedaritene û o bibo azad. Ma tîya ra reyna veng dane her kesî ke haştîye, azadîye û demokrasîyî wazeno, wa vera sîtemê îşkenceyî yê Îmraliyî vengê xo berz bikero.

Seke yeno zanayene bi desan zîndananê Tirkîya de bi seyan tepişteyî vera tecrîdê serê Birêz Ocalanî û çareserkerdişê meseleya kurdan 27ê teşrîna peyêne ra nata grevê vêşanîye de yê. Çalakîya grevê vêşanîye roja 65. de ya.  Seba ke grevê vêşanîye bêro qedînayene ganî Wezîrîya Edaletî, Meclîsê Tirkîya, CPT û heme dezgehê eleqedarî wezîfeyê xo bîyarî ca. Berpirsîyarîya tepişteyan milê înan de ya. Seba ke netîceyê giranî meqewimîye ganî cade têbigêrê.

Ma zî sey dayîkan seba ke tecrîd bêro wedritene û waştişê tepişteyan bêrê caardene xeylêk bajaran de Nobeta Edaletî tepişenê. Nobetê ma Amed, Mêrdîn, Wan, Mersin, Îzmîr, Îstanbul û Anqara de bêmabên dewam kenê. Nobetanê ma 59 rojê xo kerdî de. Ma reyna vanê; waştişê tepişteyan waştişê ma yê. Zîndan de 651ê înan gianî 1517 tepişteyê nêweşî est ê. Her roje zîndanan ra cenazaya vejîyenê. Wezîrîya Edaletî zîndanî açarnayî îşkencexaneyan. Ganî cade çareserîya merdimî bêro vînayene û tepişteyê nêweşî bêrê veradayene.  Ma veng danê Wezîrîya Edaletî û dezgehanê eleqedaran ke wa wezîfeyê xo bîyarî ca.''