Delegasyonê Îmraliyî yê Haştîye derheqê rewşa Rayberê Şarê Kurdî Abdullah Ocalanî de kombîyayîşo onlein kerd û dima ra raporêk weşena. Delegasyonî veng da rayapêroyîya mîyanneteweyîye ke semedê wedartişê tecrîdî wa şiro Tirkîya ser.

Delegasyonî ke rîyê Korona ra kombîyayîşo onlein kerd raporê xo yê 2021î eşkera kerd.

Heyeto ke waşt  wa prosesê çareserî yê 2015î newe ra dest pê bikero nê vatî: ''Netîceya her cipêrsayîşê ma de muxatabê  ma vanê binpaykerdişê heqanê merdiman rîyê tecrîdê giranî yê vera birêz Abdullah Ocalanî ra zêdîyayî. Hîrabîyayîşê sîstemê tecrîdî ramojneno ke faşîzm bîyo dezgehkî. Qanûnê bingeyî nîno caardene, Tirkîya qanûnan nêana caardene. Huqûqê mîyanneteweyî yeno binpaykerdene, qerarê mehkemeya mîyanneteweyîye nîno caardene. Herinda de nînan de zordarîye yena kerdene.

Komelê mîyanneteweyî  zî bêveng seyr keno. Na bêvengîye hemkarîya sûcî ya. Komîteya Vergirewtişê Îşkenceyî (CPT) raporê xo yê Îraliyî yê 2019î  menga tebexe ya 2020î de eşkera kerd û bi hewayêkê nêzelalî ard ziwan ke ganî tecrîd bêro wedaritene. Tirkîya herinda wedaritişî de tecrîd xorîyêr kerd. Bi qanûnanê neweyan qedexeyê vera Ocalanî û tepişteyanê bînan ê ke Îmraliyî de zafêr kerdî û tekîlîya înan bi teberî birnaye. 27ê Nîsan a 2020î ra nata Abdullah Ocalanî ra xebere nêameye girewtene. CPTî zîyaretê xo yê 2021î de semedê şîyayîşê Îmrlaiyî israr nêkerd û vatişê xo yê verênî zî teqîp nêkerdene.

Serekê Mehkemeya Heqanê Merdiman a ke Straburg de ya 2020î de Tirkîya zîyaret kerd û Unîversîteya Îstanbulî ke destûr da tasfîyekerdişê akadesmîyenanê qiymetdaran ra xelat girewt. Dima zî Mêrdîn de şaredarîyê ke qeyûm tede ameyo cakerdene de kombîyayîşî kerdî. Nê zî reyna zelal ramojna ke dezgehê Ewropa hemkarê sûcê Erdoganî yê.''

Raporda de nê ameyî vateyene:

Ganî  semedê wedartişê tecrîdî mekanîzmayê heqanê merdiman ê Ewropa şirê tirkîya ser. Bitaybetî Konseya Ewropa wa zext bikero.

Ganî  komel, dezgeh û hukmatê mîyanneteweyî vera sîtemê tecrîdî vengê xo vecê û ci rê mudaxale bikerê.

Ganî dezgehê heqanê merdiman ê Ewropa cade vera tecrîdî têbigêrê.

Ganî paştdayîşê mîyanneteweyî bêro pîlkerdene. Têgêrayîşê komelkî yê dinya paştî bidê Têgêrayîşê Azadîye yê Kurdan û muxalefetê Tirkîya. Têgêrayîşê cinîyan ê mîyanneteweyî pê eşkerayîyanê nuştekî û mesajanê vîdeoyan paştî bidê Têgêrayîşê Cinîyan ê Kurdan.

Ganî Rêxistinê Cinîyan ê Mîyanneteweyî Konseya Ewropa hîşyar bikero ke wa vera hêrişê serê cinîyan cade têbigêre, şire Tirkîya ser.

Ganî avûkatê heme dinya muracatê mekanîzmayanê hukmê mîyanneteweyî bikerê û vajê huqûq de cayê tecrîdî çîno, wa bêro wedaritene. Reyna nê avûkatî ganî paştî bidê avûkatê ke Tirkîya de yê.

Ganî na babete bêro rojemê heme dinya, xebatî bêrê kerdene û kampanyayayê paştdayîşî bêrêkerdene.

Ganî nuştox, roşnvîr kesê ke ameyî vîjnayene înan rê derheqê babete zanayîş bêro dayene ke wa şirê Tirkîya ser.

Ganî hîna zaf zîyaretkerdişê heyetan ê Kurdîstan û Tirkîya bêrê organîzekerdene  û nê heyetan de kesê eleqedar û wayîrê qale bigerê.