Hemserekanê Pêroyî yê DEM Partî Tuncer Bakirhan û Tulaye Hatimogullari badê pêvînayîşanê MHP û AKPyî yê ke ewro kerdî, eşekrayîya çapemenîye daye.

Tuncer Bakirhanî ard ziwan ke înan pêvînayîşan de qala Vengdayîşê Haştîye û Komelê Demokratîkî yê Rayber Apoyî kerd û nê vatî: ''Ma fîkrê xo vatî. Wird partîyan  de zî ma qala huqûqê haştîye kerde. Ma derheqê ardişê haştîye de erjnayîşê dergî kerdî. Ma heta ewro xeylê kombîyayîşê şarî û pêvînayîşê rêxistinanê komelî yê bînan kerdî. Zanayîşê ke ma nê pêvînayîşan de fînayî dest ma nê wird partîyan de pare kerdî. Xora şar wazeno wa gamê demokrasî û huqûqî bêrê eştene ma zî wird partîyan rê vat semedê selametê prosesî wa gamê ke hewce kenê bêrê eştene. Ma vat seba ke proses rehet bêro averberdene gerek şertê Birêz Ocalanî bibedilîyê.

Gama ke ma tîya semedê girdkerdişê hêvîya haştîye pêvînayîşan kenê ewro Kobanê 7 înan domanî 9 kesî ameyî qetilkerdene. Ma nê hêrişî şermezar kenê. Hêrs û dejê ma gird o. Birêz Ocalan zî Erdogan zî bale antebî sabotajî ser. No sabotaj hetê kamî ra ame kerdene kamî talîmatê ci de, gerek bêro eşkerakerdene. Qirkerdişê Kobanê sey Qirkerdişê Roboskî, Qirkerdişê Parisî yo. Nê nizdîbîyayîşê provekerdişê prosesî yê û gerek nê ra peyser game bêro eştene.''

Badê qiseykerdişê Bakirhanî Tulaye Hatimogullari cewab da persanê rojanmegeran. Hatimogullari nê vatî: ''Mîyanê çend rojan de programê şîyayîşê Îmrlaiyî do bibo zelal. Nika muracatê ma çîn o. Mîyanê çend rojan de planê xo ma şima rê eşkera kenê.

Operasyonê teberê sînorî hema dewam kenê. Sey meseleya asayîşî ramojnenê. Seke şima zî teqîp kenê PKKyî vengdayîşê 27ê sibate qebul kerd. Nika semedê kongre gerek Birêz Ocalan bi rêxistina xo de têkîlî rono. Gerek kanalê resnayîşî bêrê akerdene. Hema gamêke nêameye eştene. Vera qanûnê qeyûmî xora tewirê ma tim zelal o. Ma wird partîyan de derheqê qeyûmî de zî qisey kerd. Ma vat şar Newroze de Birêz Ocalanî ra mesaj paweno û wazeno ey bivîno. Eke wina game bêro eştene semedê averşîyayîşê prosesî hol beno. Ma bale ante muhîmîya nê mesajî ser û waştişê xo selahîyetdaran rê vat. Ma hêvî kenê ke ma cewabêkê pozîtîfî genê.''