Komîsyonê Huqûqî yê DEM Partî derheqê Heqê Hêvîye û bira Komîteya Wezîran a Konseya Ewropa (KE) de merkezê xo de kombîyayîşê çapemenîye viraşt.

Kombîyayîş de Vervatoxê Komîsyonê Huqûqî Ozturk Turkdoganî pare kerd ke Komîteya Wezîran a KE Tirkîya ra waşt ke mîyanê serrêke de wa derheqê heqê hêvî yê Ocalanî de têbigêra. Turkdoganî vat: ''Hîrê serrî yo komîte Tirkîya ra wazena ke heqê hêvîye bîyara ca. La wexto ke babete bena Birêz Ocalan birî nênê caardene. Eke narey zî Tirkîya na bire nîyara ca ganî Komîteya Wezîran çîyo ke hewce keno bikera. Hetê bînî ra ganî qanûnê înfazî bêro vurnayene. Ganî tecrîdê Îmraliyî cade bêro wedaritene. Pozîsyonê Birêz Ocalanî seba haştîya komelkîye girîng a. Coka wa pêşnîyazê Komîteya Wezîran a KE bîyarê ca, heqê hêvîye yê Birêz Ocalanî bişinasnê û tecrîdî biqedînê. Wa rayaumûmîya demokratîke zî seba çareserîya meseleyan û krîzan paştî bidê têkoşînê vera tecrîdî.''

Endama Komîsyonê Huqûqî Nuraye Ozdogan zî îfade kerd ke mesuldarîya Tirkîya ya ke biranê Mehkemeya Heqanê Merdiman a Ewropa, Komîteya Wezîran ûsn. bîyara ca. Nuraye vat: ''Seba akerdişê berê haştîye ganî hêverî tecrîdê Îmraliyî bêro wedaritene. Ma venga her kesî danê ke na babete de mesuldarî bigêro xo ser.''