Waye û avûkata Hemserekê Pêroyî yê Verên ê HDPyî Selahattîn Demîrtaşî yo ke Zindanê Edîrne de yo Aygule Demîrtaş hesabê xo yê medyaya komelkî ser o beyanat da.

Beyanatî de vat Selahattîn Demîrtaş zindanî de xo ra şîyo, hîşê xo vînî kerd û nêame berdene bi nêweşxaneyî. Aygule Demîrtaş vat: "26ê teşrîna peyêne de muwekîl û birayê mi Selahattîn Demîrtaş nêeşkîya nefes bigêro û xo ra şi. Wextêkê derg wina mend û mudaxeleyo verên hetê rêzdar Abdullah Zeydanî ra ame kerdene. Dima venga ambulansî ame dayene la tede têna testê EKGyî ame kerdene. Doktorê nêweşxaneyî pare kerd ke ganî Demîrtaş sewqê kardîyolojî, norolojî û gastroentrolojîyî bibo. La hewteyêk derbaz bi û Demîrtaş nêame sewqkerdene. Berpirsîyarê na rewşe nêeşkenê binê naye ra wurzê.

Hemserekanê Pêroyîyan ê HDPyî Pervîne Buldan û Sezaî Temellîyî beyanatêk da û vat: "Serekwekîlê Meclîsî û Serekwekîlê koma ma şinê Edîrne. Demîrtaş ganî sewqê nêweşxaneyî bibo. Selahîyetdarî berpirsîyarê na rewşe yê."