Denîze Poyraz 17ê hezîrana 2021î de bînaya HDPyî ya Îzmîrî de amebî qetilkerdene. Vizêr cayê qetilkerdişê Poyraze de eşkerayîyêke ameye dayene. Keyeyê Denîze Poyraz, Hetkarê Hemserekîya Pêroyî ya HDPyî Mahfuz Guleryuz, wekîlê HDPyî Sarruhan Oluç, Ayşe Acar Başaran, Gulîstane Kiliç Koçyîgît, Serpîle Kemalbay û Murat Çepnî zî tede xeylêk temsîlkarê dezgeh, rêxistin û partîyan tewrê eşkerayîye bîyî.

Eşkerayîye de verî Hemsereka HDPyî ya Îzmîrî Berna Çelîk qisey kerd. Çelîkî îfade kerd ke ê hol zanenê ke kiştoxî kamî ra cesaret girewto. Çelîke vat: ''Denîze alaya xo teslîmê ma kerde. Bara ma giran a. La paştdayîş bara ma kena sivik.''

Ayşe Acar Başaran zî pare kerd ke ê do qetî apey gamêke nêerzê. Başarane vat: ''Îqtîdar wazeno ma biqedîno. La ma waran de cewabêko xurt da, şarî vat 'Denîzêke şora bi hezaran Denîzî yenê.' Ma do vera qirkeran vengê xo berz bikerê. Alaya Denîze nêkewte erdî, destê cinîyan û şaran de ya. Ma do na ala berze bikerê.''

Serekwekîlê Koma HDPyî Saruhan Oluç, aktîvîsta TJA Derya Kandemîr, Hemvervatoxê Partîya Çepe Îbrahîm Akin û qiseykerdoxanê bînan zî bale ante têkoşînê veera sîstemê faşîstî ser.