Qezaya Depî ya Xaprêtî de çarçewa Kampanyaya 'Wexte Azadîye' de hetê Kongraya Komelê Demokratîkî (KCD) û Partîya Herêman ê Demokratîkan (DBP) ra têhetameyîşê şarî ame organîzekerdene.

Kombîyayîşo ke Rêxitina HDPyî ya Qeza de ame kerdene Hemserekê Pêroyî yê KCDyî Berdan Ozturk, Hemserekê Pêroyî yê DBPyî Keskîn Bayindir û xeylêk hemwelatîyî tewrê ci bîyî.

Keskîm Bayindîrî ke kombîyayîş de qisey kerd îqtîdarê AKP-MHPyî sey îqtîdarê tewr wehşîyî yê seserra peyêne name kerd û vat: ''Vera kurdan hêrişo topyekun yeno kerdene. Pê planê çokdayîşî wazenê peynîya kurdan bîyarê. Kurdan sey tim vera zextan çok nêda, vera hêrişî bi xoverdayîşê topyekunî cewabê hêrişkaran da. Nika oyo ke çok dano îqîtdar bi xo yo. Vera kurdan metodo ke nêame şuxulnayene nêmend. Rixmê nayî nêşekayî vera kurdan ser bikewê. Şarê kurdî têkoşînî xo her roje pîlêr keno. Ewro ra tepîya dewlete se kena wa bikero do nêeşko verê kurdan bigîro. Şarê kurdî do çirey waştişê azadîye ra peyser game nêerzo.''

Berdan Ozturkî zî vist vîrî ke zîhnîyeto serdest wazeno kurdan çîn bikero û vat: ''1923 ra nata wazenê ma rê çok bidê dayene. Wazanê ma xora bişarmê û bibê koleyê înan. La kurdan çirey verê înan de milê xo çewt nêkerd. Rixmê heme zextan çok nêda û do çirey zî çok nêdê. Têkoşînê kurdan o ke raştîya xo canêverdeno pelanê tarîxî de cayê xo girewt. Birêz Ocalanî newera ganîbîyayîş û qadîmîya kurdan vete werte. Ma meraqdarê mirnayîş û mergî nîyê. Ma çirey hêriş nêkerd la vera hêrişan ma tim xo pawenê. Têna pê metodan û rayîrê Birêz Ocalanî welat eşkeno na tengayîye ra vejîyo. Herinda dîyalogî de pê hêrişî cewab dîya Birêz Ocalanî la tewr peynî de ê do berê ci bicinê.''