Îngilîstan de Sendîkaya Unite the Union ya ke 1.5 mîlyon endamê ci estê, Kampanyaya 'Ocalanî rê Azadîye' ca ana. Rojnameyê Almanya Der Freitag hûmara xo ya nê hewteyî de ca da na kampanyaya sendîka. Rojnameyî rîpelê vengdayîşî de fotografê kongreya sendîka pare kerd ke kongre de posterê Rayberê Şarê Kurdî Abdullah Ocalanî amebi daliqnayene.

Vengdayîşê kampanyaya sendîkayan de yeno vîrvistene ke Abdullah Ocalan 22 serran ra nata bi hawayêkê îlegalî yeno tecrîdkerdene. Vengdayîş de yeno parekerdene ke kurdî Abdullah Ocalan sey îradeyê xo vînenê û azadîya ci wazenê.

Vengdayîş wina dewam keno: ''Ocalan têna fîguro sîyasî nîyo. O heman wextî de wayîrê fikrê konfederalîzmê demokratîkî yê Rojawanî, aktorê çareserîya meseleya kurdan o. Ma pê bawer ê ke şer û alozîyê Rojhelatê Mîyanênî yê ke hetê dewleta tirke ra virazîyenê, pê azadîya Ocalanî û tepişteyan ê sîyasîyan ê bînan do biqedê.''