Xebera kovara Der Spiegelî de bi îmzaya Anna-sophie Schneider bale ameye antene  wext û armancê operasyonanê qirkerdişê sîyasî yê vera HDPyî ser. Xebere de hêverî nawnayîşê serra 2014î yê seba Kobanê yenê vîrvistene. Xebere de yeno parekerdene ke derheqê nê serebûtan de Selhattîn Demîrtaş û Fîgene Yuksekdag serranê 2016 û 2017î de tepişîyayî û nika zî 82 îdarekarê HDPyî bîlasebeb ameyî tepiştene. Xebere dana zanayene ke Hemşaredarê Qersî Ayhan Bîgen û endamê Heyetê Îmraliyî Sirri Sureyya Onder zî mîyanê nê tepişteyan de yê.

Xebera Spiegelî  de noqtayêka bîne ya girînge na ya ke Serdozgerîya Komare ya Anqara Yuksel Kocaman roja ke zewijîya cinîya xo reyde Qesre de Recep Tayyîp Erdogan zîyaret kerd. Xebere de yeno vatene ke Kocamanî morê xo da binê nê operasyonanê vera HDPyî û sey dîyarîya nê operasyonî pêşkêşê Qesre kerdî.

Xebere de derheqê operasyonan de  vînayîşê îdarekaranê HDPyî ra Azad Bariş û rojnamegerê tirkî Murat Yetkîn yenê parekerdene. Azad Barişî ard ziwan ke operasyonî seba parçekerdiş û fatisnayîşê îtîfaqê muxalefetî yenê kerdene. Azad Barişî îfade kerd ke eleqeyê nê tepişteyan bi nawnayîşanê Xoverdayîşê Kobanê çin o.

Barişî vist vîrî ke weçînayîşanê herêmîyan ê Îstanbul û Anqara zî tede xeylêk şaristanî  bi paştdayîşê weçînitoxanê HDPyî destê AKPyî ra vejîyayî û AKP  qesasê naye zî gêno.

Murat Yetkîn zî eşkera kerd ke Erdogan seba ke rayanê neteperweran bigêro hêrişê HDPyî keno.