Qezaya Dêrikî ya Mêrdinî de vizêr veraşan TIRêk  qeza keza kerd. Gama ke hemwelatîyî vazdayê gazîyê birîndaran franê yewna TIRî teqa û kewt mîyanê qelebalix. Qeza de 20 kesan dinyaya xo bedilnaye û bi desan kesî birîndar bîyî.

7ê înan bi giranî 26 kesê ke qeza de birîndar bîyî Nêweşxaneyê Cigêrayîş û Perwerdeyî yê Mêrdînî û Nêweşxaneyê Dewlete yê Qoser û Dêrikî de yenê tedawîkerdene. Derheqê qeza de cigêrayîş dîya destpêkerdene û di ramitoxî ameyî destbendkerdene. Şahîdanê qezayî vat badê qezayê verênî tedbîrî nêameyî girewtene û wesayîtanê Cengiz Holdingî yê ke bar kiriştêne zaf lez bî.

Vervatoxa HDPyî Ebru Gunaya ke badê qeza verê Nêweşxaneyê Dêrikî de eşkerayîye daye û  bale ante îxmalî ser û vat: ''No yew felaket o. Îxmalî zaf ê. Xeylêk wext o ke cehdeyo tewr serek bîyo yew şerîd û tira TIRî ravêne. Firenê TIRêkî teqeno. Merdimî şinî gazîyê birîndaran la tedbîrî nînê girewtene. Nîm saete dima ra TIRo bîn yeno kewno mîyanê qelebalixî û beno sebebê facîa. Nê TIRê Cengiz Holdingî yê û kontorlê înan nêameyî kerdêne. Pêro zanê ke nê TIRî tim benê sebebê mergî. Nêweşxaneyê Dêrikî de zî îmkanê tedawîkerdişê birîndaran çîn ê. Birîndarî sewqê nêweşxaneyanê bînan benê.''

Badê otopsî cenazayî teslîmê keyayan bîyî. Kesê ke qeza de merdî û heta nika nameyê înanê  ke eşkera bîyî wîna yê: Şervan Tanrisever, Mihribane Tanrisever, Kemal Dag, Necla Arda, Maşallah Bağlayan, Mülkiye Acar, İsa Ayebe, Hamit Akkoyun, İnan Berk, Sitti Abul, Hatip Denk, Ahmet Akdag, Mehmet Ekinci, Bawer Babur, İrfan Aktaş, Baran Açan, Yahya Ergun.